प्रकाश दाहालको निधनले जुराएको हाइप्रोफाईल भेट

२०७४ मंसिर ४ गते सोमबार, प्रकाशित

नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’का पुत्र प्रकाश दाहालको आकस्मिक हृदयाघातका कारण निधन भएपछि प्रधानमन्त्री शेरबहादुर देउवा, पुर्वप्रधानमन्त्री तथा एमालेका बरिष्ठ नेता माधवकुमार नेपाल र एमाले अध्यक्ष केपी शर्मा ओली लाजिम्पाट पुगेका छन् ।

देउवा, नेपाल र ओली सोमबार बिहान प्रकाशलाई श्रद्धाञ्जली दिन र शोकमा डुबेको प्रचण्ड परिवारलाई समवेदना प्रकट गर्न लाजिम्पाट पुगेका हुन् । देउवा र ओलीले प्रकाश दाहालको असामयिक निधनले आफूहरु मर्माहत भएको भन्दै प्रचण्ड परिवारका सदस्यलाई गहिरो समवेदना प्रकट गरेका थिए ।

आइतबार बिहान ५ः५० बजे अचेत अवस्थामा भेटिएका प्रकाशलाई सुरक्षाकर्मीले थापाथलीस्थित नर्भिक अस्पताल पुर्याएको केहि मिनेटमै चिकित्सकले मृत घोषिणा गरेका थिए । प्रकाशको आइतबार नै अन्तिम संस्कार गरिसकिएको छ ।

यसैबीच प्रकाशको निधनमा चीन, भारत, राष्ट्र संघ लगायतका विभिन्न देश र कुटनीतिक नियोगका प्रतिनिधिहरुले समवेदना प्रकट गरेका छन् । सोमबार बिहान राष्ट्रपति विद्यादेवी भण्डारीले पनि अध्यक्ष प्रचण्ड र सल्लाहकार सीता दाहाललाई लाजिम्पाटमा भेटी समवेदना प्रकट गरेकी छिन् ।

समवेदना प्रकट गर्दै राष्ट्रपति भण्डारीले प्रकाश दाहालप्रति समवेदना प्रकट गर्दै धैर्य रहन प्रचण्ड र सीता दाहाललाई आग्रह गरेकी थिइन् ।