दश हजार घुससहित प्रहरी अख्तियारको फन्दामा

२०७४ माघ २१ गते आइतबार, प्रकाशित

दश हजार घुस रकमसहित जनकपुरमा एक घुमुवा प्रहरी जवान पक्राउ परेका छन् । धनुषाको लक्ष्मीनिया अस्थायी प्रहरी चौकीमा कार्यरत प्रहरी जवान मनोज प्रसैलालाई आइतबार अख्तियारको बर्दिबास कार्यालयबाट खटेको टोलीले घुस रकमसहित नियन्त्रणमा लिएको हो ।

जनकपुरको भ्रमरपुरा चोकस्थित एक चिया पसलमा एकजना व्यापारीसँग अवैद्य मदिरा पसल सञ्चालन गर्न सहज वातावरण बनाइदिने र इजाजत पत्रसमेत उपलब्ध गराइदिने भन्दै दश हजार घुस रकम लिँदै गर्दा उनी पक्राउ परेका हुन् ।

गोप्य सूचनाको आधारमा अख्तियारको टोलीले प्रसैलालाई निगरानी गरिराखेको र घुस लिने बित्तिकै रंगेहात पक्राउ गरेको हो । उनलाई हाल पदबाट निलम्बन गरिएको छ । प्रसैलालाई आइतबार बर्दिबासस्थित आयोगको कार्यालयमा राखिने र सोमबार काठमाडौं प्रहरी मुख्यालयमा पठाउने तयारी भएको छ ।