आजबाट दशैंका लागी अग्रिम टिकट बुकिङ खुला

२०७५ असोज ८ गते सोमबार, प्रकाशित

यसअघि तेलको मुल्य बृद्धि भएको बिरोधमा दशैंको अग्रिम टिकट बुकिङ रोकेका यातायात ब्यवसायीले भाडा बढाउने सहमती भएपछी आजबाट अग्रिम टिकट बुकिङ खोल्ने भएका छन । नेपाल यातायात व्यवसायी महासंघको बैठकले आज ९ गतेबाटै अग्रिम टिकट बुकिङ खुला गर्ने निर्णय गरेको हो ।

यसअघि ५ गतेबाट खुला गर्ने भनिएको अग्रिम टिकट बुकिङ व्यवसायीहरुले इन्धनको मूल्य वृद्धिको विरोध गर्दै रोकेका थिए । सरकारसंगको वार्तामा १० प्रतिशत गाडीभाडा बढाउने सहमती भएपछी महासंघको बैठक बसेर टिकट बुकिङ खुला गर्ने निर्णय गरेको हो ।

पेट्रोलियम पदार्थमा भएको मूल्य वृद्धि अनुरुप सार्वजनिक यातायातको भाडादर समायोजन भएपछि अग्रिम टिकट बुकिङ खुला गर्न निर्णय भएको नेपाल यातायात व्यवसायी राष्ट्रिय महासंघका महासचिव सरोज सिटौलाले जानकारी दिएका छन ।

बढाइएको १० प्रतिशत भाडा अनुसार यातायात व्यवस्था विभागले आइतबार देशभरका विभिन्न रुटको नयाँ भाडादर सार्वजनिक गरेको थियो । निगमले डिजेल र मट्टीतेलमा प्रतिलिटर ३/३ र पेट्रोलमा २ रुपैयाँ मूल्य बढाएपछि समायोजन गरिएको भाडादर अनुसार शहरी क्षेत्रमा न्युनतम १४ देखि अधिकतम १८ रुपैयाँ भाडा कायम गरिएको छ ।