आफ्नै बहिनि ज्वाँईले श्रीमती भगाईदिएपछी हैरान

२०७५ असोज २० गते शनिबार, प्रकाशित

कञ्चनपुर भीमदत्त नगरपालिका–५ सुकासालमा बसोबास गर्दै आएका ३० वर्षीय पन्नालाल मोर्याले आफ्नै जेठान हरिस दमाईकी श्रीमती द्रोपती दमाईलाई भगाएका छन । मोर्याले द्रोपतीलाई मायाजालमा पारेर वा आर्थिक प्रलोभनमा पारेर बेच्नका लागि लगेको हो भन्नेबारे प्रष्ट नभएको परिवारले बताएका छन ।

पन्नालालको स्थायी घर भने भारतको पिलिभित हो । बहिनी ज्वाँईले आफ्नै श्रीमती भगाउँदा जेठान हरिश दमाई भने एकदमै हैरान भएको बताउछन । हरिस आफ्नी आमा रोहिता दमाई, दिदी ईश्वरी मोर्या (दमाई) सहित उनीहरुलाई खोजबिन र कार्बाहीका लागि शुक्रबार उजुरी गर्न जिल्ला प्रहरी कार्यालय कञ्चनपुरमा आएका थिए ।

पन्नालालकी श्रीमती ईश्वरीले बिहीबार दिउँसो १२ बजेतिर श्रीमान तरकारी ल्याउँछु भन्दै बजार हिँडेको बताइन । उता भीमदत्त नगरपालिका १० तिलकेनीका हरिस दमाईकी श्रीमती द्रोपति दमाई पनि पेट दुखेको भन्दै जिमुवा अस्पताल जान भन्दै घरदेखि हिँडेका थिईन ।

‘दुवै जना एकै साथ एकै समयमा आ–आफ्नो घरबाट निस्किए, अबेरपखसम्म पनि दुवै घर आएनन, ‘ईश्वरीले भनिन्–‘मैले मेरा श्रीमान घरमा नआएपछि उता माइतमा फोन गरेर द्रोपतिको बारेमा बुझेँ । उनी पनि घर आएकी थिईनन मलाई थाहा भयो, कि दुवै जना भागेर भारत गए ।’

दुवैले चलाउँदै आएको फोन पनि नलागेपछि भागेको थाहा भएको उनले बताइन । पन्नालाल र ईश्वरीको ११ वर्ष पहिले मागी विवाह भएको थियो । उनीहरुका दुई छोरामात्रै छन । यता हरिस र द्रोपतिको पनि १२ वर्ष अघि मागी विवाह भएको थियो ।

उनीहरुको दुई छोरीमात्रै छन । पन्नालाल र द्रोपतिबीच फोन सम्पर्क हुने गरेको पन्नालालकी श्रीमती ईश्वरीले बताइन । ‘दुवै जनाबीच फोन हुन्थ्यो ।’ उनले भनिन ‘मैले त सोच्थेँ भाउजुसंग फोन गर्दैमा के हुन्छ ।’ आज श्रीमानका कारण दाजु र बहिनीको जिन्दगी बर्बाद भएको उनले दुखेसो पोखिन ।

हरिसले ज्वाईसंगै भागेर गएकी श्रीमतीलाई कुनै पनि हालतमा स्वीकार नगर्ने जिकिर गरेका छन । ‘मेरी बहिनीका श्रीमानसंग गएकी श्रीमतीलाई राख्ने कुरै भएन’ उनले भने–‘यस्तो धोकादिनेसँग कसरी बस्न सकिन्छ ।’