धमलाको दुबै मृगौला फेल, सहयोगका लागी अपिल

२०७५ माघ २४ गते बिहीबार, प्रकाशित

राम्रो अंक ल्याएर ब्याचलर लेभलको परिक्षा उतिर्ण गरेका चौतारा साँगाचोकगढी नगरपालिका–४ का २३ वर्षिय आशिष धमला यतिवेला प्राणकै परीक्षा दिइरहेका छन् । कलिलै उमेरमा दुवै मृगौला फेल भएपछि उनी २ महिनादेखि अस्पतालको बेडमा पल्टिएर जीवन रक्षाका लागि हारगुहार मागिरहेका छन् ।

सहारा बन्नुपर्ने छोरा नै अस्पतालको बेडमा पल्टिएपछि आशिषका बाबु पशुपति धमला छोरा बचाउनका लागि सहारा मागिरहेका छन् । पाँचवर्षअघि बैदेशिक रोजगारीका लागि दुवई गएका उनी छोराको दुवै मृगौला फेल भएको खवर पछि गतसाता नेपाल फर्कीए ।

‘बुढेशकालको सहारा बन्नुपर्ने छोरा नै आज जीवन मरणको दोसाँधमा प¥यो’, सोमबार छोरा बचाउनका लागि गुहार माग्दै चौतारा साँगाचोकगढी–४ स्थित वडा कार्यालयमा आइपुगेका उनले भने,–‘लौ न हजुर मेरो छोरा बचाइदिनुस् ।’

पशुपतिले काठमाडौको बनस्थलीस्थित अस्पतालमा छोराको उपचार गराइरहेका छन् । उपचारका लागि ३० लाख भन्दा बढि खर्च हुने अस्पतालले बताएपछि उनले आर्थिक सहायताका लागि आग्रह गरिरहेका छन् । ‘तीस लाख खर्च लाग्नेरहेछ, ७ लाख खर्च गरिसकें’, उनले भने,–‘साथमा पैसा छैन, बेचौं भने सम्पती छैन ।’

आशिषको उपचारका लागि रकम जुटाउन बैंकमा खाता खोलिएको भएपनि हालसम्म कहिँकतैबाट रकम नजुटेको उनले दुख सुनाए । आशिषकी आमा रुकू धमलाका नाममा एभरेष्ट बैंकमा खाता खोलिएको छ ।

आशिषको उपचारमा सहयोगका लागि एभरेष्ट बैंकको ०४८००५०१२०२२४८ मा सहयोग रकम जम्मा गरिदिन उनले सहयोगी मनहरुलाई अनुरोध गरेका छन् । लाउँलाउँ खाउँखाउँ भन्ने उमेरका आशिषको जिवन रक्षाका लागी मानविय नाताले सहयोग गरिदिन उनका परिवारले अनुरोध गरेका छन् ।