नेपालप्रति नरम अमेरिका, प्रचण्डलाई भ्रमणको निम्तो

२०७५ माघ २८ गते सोमबार, प्रकाशित

भेनेजुएला प्रकरणमा अमेरिकाको आलोचना गरेका बिबादमा तानिएका नेकपा अध्यक्ष पुष्पकमल दाहाल प्रचण्डलाई अमेरिकी राजदूत र्याण्डी बेरीले निवासमै गएर भेट गरेको खुलासा भएको छ । नेकपाका एक नेताले राजदूत बेरीले प्रचण्डलाई अमेरिका भ्रमणको निम्तोसमेत दिएको दाबी गरेका छन् ।

राजदूत बेरीले शनिबार खुमलटारस्थित निवासमै गएर प्रचण्डसँग भेट गरेको नेकपाका केन्द्रीय नेता एवं सांसद देवेन्द्र पौडेलले पुष्टि गरेका छन् । आइतबार रिपोर्टर्स क्लबमा बोल्दै नेता पौडेलले भने–‘नेपालस्थित अमेरिकी राजदुत र हाम्रो पार्टीका अध्यक्ष प्रचण्डबीच हिजो एक्लाएक्लै भेटवार्ता भैसकेको छ । अब यो समस्या (भेनेजुएला प्रकरण) हल भयो ।’

अमेरिकी राजदुतले प्रचण्डलाई अमेरिका भ्रमणको निम्तोसमेत दिइसकेको नेकपा नेता पौडेलले खुलासा गरेका छन् । साक्षात्कारमा नेता पौडेलले भनेका छन्–‘सबै कुरा मिलिसक्यो । सहमति भैसक्यो । अब यसलाई अनावश्यक रुपमा उचाल्नु हुँदैन ।’

भेनेजुएला प्रकरणमा नेकपा अध्यक्ष प्रचण्डको वक्तव्यपछि तीव्र प्रतिक्रिया दिइरहेको अमेरिकी दूतावास नेपालको मामिलामा केही नरम जस्तो देखिन थालेको छ । सरकारले आयोजना गरेको राजदूतहरुको ब्रिफिङमै नआएका अमेरिकी राजदूत बेरीले यसवीचमा प्रधानमन्त्री केपी शर्मा ओलीसँग पनि भेटघाट र कुराकानी गरिसकेका छन् ।

यसवीचमा राजदूत बेरीले प्रचण्डलाई समेत निवासमै पुगेर भेटेपछि अमेरिकी कूटनीतिज्ञहरु नेपालको मामिलामा नरम रुपमा प्रस्तुत हुन थालेको संकेत मिलेको छ ।

के अब प्रचण्ड अमेरिका जालान् त ?
भेनेजुएलामा अमेरिकी हस्तक्षेपबिरुद्ध नेकपा अध्यक्ष प्रचण्डले विज्ञप्ति जारी गर्नुपूर्व पत्नी सीता दाहालको उपचारका लागि अमेरिकाको भिसासमेत लिइसकेको चर्चा थियो ।

तर, भेनेजुएला प्रकरण चर्किएपछि प्रचण्डको अमेरिका जाने योजना स्थगन भएको थियो । राजदूत बेरीले निवासमै आएर अमेरिका भ्रमणको निम्तो दिएपछि अब प्रचण्डलाई सीताको उपचारार्थ अमेरिका जाने बाटो खुलेको छ ।

प्रधानमन्त्री ओली र प्रचण्डबिच ३ घण्टा छलफल
नेकपाका अध्यक्षद्वय केपी शर्मा ओली र प्रचण्डबीच बालुवाटारमा तीन घण्टा छलफल भएको समेत नेता देवेन्द्र पौडेलले साक्षात्कारमा खुलासा गरेका छन् । पौडेलले भनेका छन्–‘उहाँहरुबीच तीन घण्टा कुराकानी भयो । मिलेर जाने सहमति भएको छ । अहिले देखिएका सबै समस्या हल गरेर जाने सहमति भएको छ ।’

पौडेलका अनुसार सरकार सञ्चालन गर्दा मिलेर अघि बढ्ने र पार्टीबाट निर्णयहरु गर्दा सल्लाह गर्नेबारे दुबै अध्यक्षवीच सहमति भएको छ । त्यसैगरी पार्टी एकीकरणको कामलाई दुबै अध्यक्षले पहलकदमी लिने र पार्टीभित्र अन्तरसंघर्षमा नफस्नेबारे प्रचण्ड र ओलीवीच कुराकानी भएको पौडेलले बताएका छन् ।