कोरोनाको आशंकामा दुई जना टेकु अस्पताल भर्ना

२०७६ फागुन २० गते मंगलबार, प्रकाशित

कोरोना (कोभिड१९) को आशंकामा मंगलबार फेरि दुई जनालाई टेकुस्थित शहीद शुक्रराज ट्रपिकल तथा सरुवा रोग अस्पतालको आइसोलेसन वार्डमा भर्ना गरिएको छ ।

कोरोना संक्रमणको आशंकामा दुई जनालाई आइसोलेसनमा राखिएको अस्पतालका प्रवक्ता डा. अनुप बास्तोलाले जानकारी दिएका हुन् । बास्तोलाका अनुसार आइसोलेसनमा राखिएका दुई जना बिरामी मध्ये एक जना दक्षिण कोरिया र अर्का मध्यपूर्वबाट आएको बताइएको छ ।

कोरोना संक्रमणको आशंकामा गत आइतबार भर्ना भएका ४ जनाको रिपोर्ट भने नेगेटिभ आएपछि चारै जनालाई मंगलबार अस्पतालले डिस्चार्ज गरिदिएको छ । डिस्चार्ज हुने चारै जना नेपाली नागरिक हुन् ।

डिस्चार्ज भएका एक जना चीनबाट र अर्का तीन जना दक्षिण कोरियाबाट फर्केका व्यक्ति थिए । दुई महिनाअघि चीनबाट सुरु भएको कोरोना भाइरस अहिले विश्वका ६५ भन्दा बढी देशमा फैलिइसकेको छ ।

दक्षिण कोरिया, जापान, इरान र इटालीजस्ता देशहरुमा पनि मानिसको मृ*त्यु भएपछि विश्व स्वास्थ्य संगठनले उच्च सतर्कता अपनाउन आह्वान गरेको छ । विश्व स्वास्थ्य संगठनले यसअघि नै विश्व स्वास्थ्य संकटकालको घोषणा गरिसकेको छ ।