ज्यान दिन्छौँ तर जमीन छाड्दैनौँ ; खनाल

२०७३ साउन १८ गते मंगलबार, प्रकाशित

भारतप्रति नझुकेकै कारण प्रधानमन्त्री केपी शर्मा वलीले सत्ता गुमाएको केही समय नवित्दै पूर्वप्रधानमन्त्री एवम सोही पाटी नेकपा एमालेका वरिष्ठ नेता झलनाथ खनालले पनि भारत विरुद्ध कडा अभिव्यक्ती दिनुभएको छ । नेपाली स्वाभिमानको सम्मान गर्न आग्रह गर्दै खनालले नेपालीलाई भारतको एक इन्च पनि माटो नचाहिने र आफूहरुले पनि एक इन्च नछोड्ने बताउनु भएको छ ।

सप्तरीको तिलाठीमा भारतीय नागरिकसँग प्रतिरोध गर्नेहरुको सम्मानमा मंगलबार आयोजित कार्यक्रमलाई सम्वोधन गर्दै खनालले भारतले नेपालीको स्वाभिमानलाई सम्मान नगरे पूर्व मेचीदेखि पश्चिम महाकालीका सबै जनता प्रतिरोधमा उत्रिने चेतावनी दिनुभयो ।

खनालले भन्नुभयो, ‘भारतले एकलौटी रुपमा बनाएका बिभिन्न बाँधले तराईका जनताले दुःख सहनु परेको छ । अहिले तिलाठी बोलेको छ, भोलि झापादेखि कन्चनपुर सबै तिलाठी हुनसक्छ ।’

दशगजा मिचेर बाँध बनाउन खोज्ने भारतीयको तिलाठीबासीले प्रतिरोध गरेका थिए । सो क्रममा भारतीयको आक्रमणबाट नेपालीहरु घाइते भएका थिए । तिलाठी घटनामा घाइते रामनारायण यादव र दुर्गानन्द झालाई राष्ट्रिय स्वाभिमानको लागि युवा अभियान नामक संस्थाले मंगलबार सम्मान गरेको हो ।

सम्मान कार्यक्रममा बोल्दै एमाले नेता खनालले भन्नुभयो, ‘आफ्नो स्वाधिनताका लागि नेपालीहरु कसैसँग झुक्दैनन् भन्ने तिलाठीको घटना हो । तिलाठीमा भारतले एकलौटी बाँध बनाएको हो । हामी स्वीकार गर्न तयार छैनौं ।’

देश सानो भए पनि सार्वभौम सानो हुँदैन भन्ने कुरा भारतले ख्याल गर्नुपर्ने खनालले बताउनुभयो । नवलपरासीको सुस्ता, कालापानी, लिपुलेक, लिम्पियाधुरा लगायत भारतले सीमा मिचेका नेपाली भूमिहरुको नाम लिँदै खनालले तिलाठी घटनाबाट नेपाल र भारतले पाठ सिक्नुपर्ने धारणा राख्नुभएको छ ।

‘तिलाठीले भारत र नेपाल सरकारलाई पाठ सिकाएको छ । जनता उत्रिए भने कुनै पनि गलत काम स्वीकार्य हुन सक्दैन भन्ने यो गतिलो पाठ हो,’ खनालले भन्नुभयो ।