नेदरल्याण्डमाथि नेपालको सानदार जित

२०७३ साउन ३१ गते सोमबार, प्रकाशित

आइसिसी विश्व क्रिकेट लिग च्याम्पियनसिप अन्तर्गत चौथो चरणको दोस्रो खेलमा नेपालले पारस खड्काको कप्तानी पारीको मदतमा नेदरल्यान्ड्सलाई १९ रन ले हराएको छ । पहिलो खेलमा ७ विकेटको हार व्यहोरेको नेपालको यो जितसँगै शीर्ष चारमा पर्ने सम्भावना कायमै रहेको छ ।

नेदरल्यान्डको आमस्ट्रडममा टस हारेर पहिले ब्याटिङ गरेको नेपालले निर्धारीत ५० ओभरमा नौ विकेट गुमाउँदै २१७ रन बनाएको थियो । २१८ रन विजयी लक्ष्य पछ्याएको घरेलु टोली नेदरल्याण्डले ४८.३ ओभरमा सबै विकेट गुमाएर १९८ रन मात्र बनाउन सफल भएको थियो ।

अन्तिम दुई ओभरमा नेदरल्याण्डलाई २३ रन चाहिएको थियो । तर, दोस्रो बलमा सोमपालले विकेट लिए । तेस्रो बलमा मलिक रन आउट भएपछि नेपालले १९ रनको जित हात पारेको हो ।

खराब सुरुवात गरेको नेदरल्याण्डले आठौं ओभरमा मात्र २१ रन जोड्दा ३ विकेट गुमाएको थियो । मध्यक्रमका ब्याट्सम्यानले पारी सम्हालेका थिए । रे भान डेरले ५६ रन बनाए भने गुर्जितर्सले ४४ र ओडाउडले ३५ रन जोडेका थिए । यस्तै टी भान डेरले ३६ रन जोडेका थिए ।

नेपालका पारससँगै सोमपाल कामी र बसन्त रेग्मीले २–२ विकेट लिएका थिए । शक्ति गौचन, सन्दिप लामिछाने र सागर पुनले १–१ विकेट हात पारेका थिए ।

खराब सुरूवात गरेको नेपालले पनि ६५ रन जोड्दा ३ विकेट गुमाएको थियो । तर, पारस खड्का र सागर पुनले नेपाली पारी सम्हालेका थिए । उनीहरुले चौथो विकेटका लागि ११८ रनको महत्वपूर्ण साझेदारी गरेका थिए ।

कप्तान पारस खड्काले ८४ रन बनाएका थिए भने सागर पुनले ४५ रनको साझेदारी गरेका थिए । उपकप्तान ज्ञानेन्द्र मल्लले ३९ रन बनाए भने विनोद भण्डारीले १७ रन बनाएका थिए । अन्य ब्याट्सम्यानले भने दोहोरो अंक जोड्न सकेनन् ।

घरेलु टोली नेदरल्याण्डका लागी लागि भान मिकेरनले ३ तथा किङ्मा र रिपोनले २–२ विकेट लिएका छन् । नेदरल्याण्डको ८ खेलमा यो पहिलो हार हो ।