भारत छिर्यो पाकिस्तानी भुमिमा, सिमानामा गोलाबारी

२०७३ असोज १३ गते बिहीबार, प्रकाशित

उरी हमलाको १० दिनपछि भारत र पाकिस्तानको सीमा क्षेत्रमा पुनः तनाव शुरु भएको छ । भारतीय सेनाले पाकिस्तानको भुमिमा घुसेर थुप्रै शिविरहरुलाई तहसनहस गरी ३८ आतंकबादी मारेको दाबी गरेको छ । उता पाकिस्तानले भने भारतले आफ्नो सैनिक पोष्टमा आक्रमण गरेको र दुई जना सैनिक मारेको पुष्टि गरेको छ ।

भारतीय सञ्चार माध्यममा दिईएको समाचार अनुसार कारवाहीमा अहिलेसम्म पाकिस्तानका ३८ ‘आतंकवादी’ को मृत्यु भएको भारतको दाबी छ । उता पाकिस्तानले भने आतंकवादीका नाममा भारतले खुला अत्याचार गरेको बताएको छ ।

भारतीय सेनाका अनुसार नियन्त्रण रेखा नजिकै चरमपन्थीमाथि सर्जिकल स्ट्राइक्स गरिएको हो । विदेश मन्त्रालयको पत्रकार सम्मेलनमा लेफ्टिनेन्ट जनरल रणवीर सिंहले भने–‘यो बुधबार राति भएको हो । जब आतंकवादी नियन्त्रण रेखामा जम्मा भएका थिए ।’

उनका अनुसार आतंकवादीको लञ्च प्याडमा भारतीय सेनाले सर्जिकल स्ट्राइक गरेको थियो । यसबाट आतंकवादीहरुलाई ठूलो क्षति पुगेको र अपरेशन सकिएको भारतीय सेनाले बताएको छ । जनरल रणधीर सिंहले लाइन अफ कन्ट्रोल (एलओसी) पारी सर्जिकल स्ट्राइकको कारवाही रातभरी चलेको जानकारी दिएका हुन ।

सिीमा नजिकै आतंककारी जम्मा भएको र उनीहरु भारतको सीमाभित्र घुस्ने तयारीमा रहेको जानकारी पाएपछि आफूहरुले सर्जिकल कारवाही सुरु गरेको रणवीर सिंहले बताएका छन् । उनले भने, ‘हाम्रो उद्देश्य आतंककारीको उद्देश्यलाई विफल बनाउनु थियो ।’

यता पाकिस्तानी सेनाले भारतको दाबीलाई खण्डन गर्दै एलओसीमा गोलीबारी मात्र चलेको बताएको छ । पाकिस्तानी सेनाका अनुसार गोलीबारी रातको साढे दुई बजेदेखि बिहान चार बजेसम्म चलेको थियो । उनीहरुका अनुसार नियन्त्रण रेखामा बिना कुनै उक्साहट भारतको तर्फबाट भिम्बर, हट स्प्रिंग, केल र लिपा सेक्टरमा गोलीबारी भएको थियो ।

‘भारतको तर्फबाट कुनै सर्जिकल स्ट्राइक भएको थिएन । यो सीमा पारीबाट गरिएको गोलीबारी थियो जुन पहिले पनि हुने गर्दथ्यो ।’ पाकिस्तानी सेनाको तर्फबाट जारी आधिकारीक बयानमा भनिएको छ–‘यदि पाकिस्तानको जमिनमा कुनै सर्जिकल स्ट्राइक भएमा त्यसको कडा जवाफ दिइनेछ ।’