मेलम्चीको पहाड खन्दा सुन भेटिएको आशंका

२०७३ मंसिर १७ गते शुक्रबार, प्रकाशित

मेलम्ची आयोजनाको हेडवक्र्स साइटमा सुन जस्तो पहेँलो पदार्थ भेटिएपछी निर्माणको काम रोकीएको छ । हेडवक्र्स साइटमा भेटिएको सो पदार्थ महत्वपूर्ण खनिज भएको हुनसक्ने आशंका गरिएको छ ।

मेलम्ची नदी छेउ छेउको पहाड काट्ने क्रममा पहेंलो पदार्थ भेटिएपछि तत्कालका लागी काम रोकेर सो क्षेत्रलाई सुरक्षा प्रदान गरिएको छ । मेलम्ची आयोजना प्रमुख घनश्याम भट्टराईका अनुसार पहाड काट्दा निस्कएको माटोमा चम्किलो पहेँलो कणहरु देखिएका छन् ।

आयोजना प्रमुख भट्टराईका अनुसार त्यो के पदार्थ हो भन्ने त्यहाँ खटिएका इञ्जिनियरले पत्ता लगाउन सक्ने अवस्था छैन । त्यो जे भए पनि राष्ट्रको अमूल्य खनिज सम्पदा हुन सक्ने भएकाले त्यसको सुरक्षा गर्नुपर्ने भएकाले त्यहाँ काम बन्द गरेर खानी विभागमा जानकारी गराएका भट्टराईले बताएका छन् ।

खानी विभागको प्राविधिक टोलीले त्यो पदार्थ के हो भन्ने प्रमाणित नभएसम्म मेलम्ची आयोजनाको हेडवक्र्सका लागि पहाड काट्ने काम सुरु नहुने भएको छ । साइटमा झण्डै ४० जना कामदार खटिएका थिए । प्रहरीको सुरक्षा घेराभित्रैको क्षेत्र भएकाले असुरक्षा नरहेको आयोजनाले जनाएको छ ।