कानपुर रेल बम बिष्फोटका कमाण्डर नेपालबाट पक्राउ

२०७३ माघ २५ गते मंगलबार, प्रकाशित

नेपाल भारत सिमा स्थित बारा जिल्लासँग सिमाना जोडिएको घोडासन रेल्वे ट्रयाकमा बम विष्फोट गराउने सम्शुल होदालाई प्रहरीले सार्वजनिक गरेको छ । काठमाडौंको महाराजगञ्जमा लुकिछिपी बसेको अवस्थामा होदालाई नियन्त्रणमा लिईएको बारा प्रहरीले जानकारी दिएको छ ।

बारा पर्शुरामपुर–४ स्थायी घर भएका होदा २०७० सालमा भएको दोस्रो संविधानसभा निर्वाचनमा सभाषदको उम्मेद्वार थिए । चुनावको बेला खर्च भएको साढे २ करोड ऋण तिर्न नसकेपछि आतंकबादी गतिवीधीमा लागेका होदाले गत अक्टोबर १ तारिखका दिन बारासँग सीमा जोडिएको भारतको घोडासहनस्थित रेल्वे ट्रयाकमा बम विष्फोट गराउने असफल प्रयत्न गरेका थिए ।

गएको नोभेम्बर २० मा कानपुरको पुखराया नजिक गराईएका विष्फोटमा समेत होदाको हात रहेको भारतीय पक्षले दावी गरेको थियो । चुनाव हारेपछी शुरुमा जाली नोटको कारोवार शुरु गरेका होदा पछि बम विष्फोट गराउने कार्यमा संलग्न भएका थिए ।

पाकिस्तानी आईएसआईसँगको मिलेमतोमा बम विष्फोट गराउने कार्यमा संलग्न होदाले प्रहरीसँगको प्रराम्भिक बयानका क्रममा जाली नोट कारोवारमा खासै कमाई नभएकोले बम विष्फोटको योजना बनाएको बताएका छन् । जाली नोटको कारोबार गर्दागर्दै दुबईको अपराधिक गिरोहसँग भेटेका होदाले केही भारतीय र नेपाली युवाहरु प्रयोग गरेर नेपाल भारत सिमानाको रेल्वे ट्रयाकमा बम राख्न लगाएका थिए ।

यसरी खुल्यो आइएसआईको नेपाल कनेक्सन
गएको पुस १३ गते बाराको हरैया जंगलमा घाँटी रेटेर हत्या गरिएको अवस्थामा भारतका दिपक राम र अरुण राम फेला परे । हत्या पाकिस्तानी खुफिया एजेन्सी आइएसआइको निर्देशनमा गरिएको खुलेपछि नेपाली र भारतीय प्रहरीले घटनाको कनेक्सन खोतल्न शुरु गर्यो ।

त्यहि क्रममा खुल्यो, नेपालमा आइएसआइको एजेन्टका रुपमा काम गर्दै आएका बाराको कलैया घर भएका समशुल होदाकै निर्देशनमा दिपक र अरुणको हत्या भएको रहश्य । विगत लामो समयदेखी दुवई बस्दै आएका होदाले नेपालमा आइएसआइको एजेन्टको रुपमा काम गर्दै आएको खुलेपछी नेपाल र भारतका प्रहरी उनको खोजिमा लागे ।

बाराको सीमासंग जोडिएको भारतको घोडासहन स्थित रेल्वे ट्रयाकमा बम राख्नका लागि होदाले बाराको महागढीमाइ नगरपालिकाको सिमरा तेगछीयका गिरी बाबा भन्ने बृज किशोर गिरी मार्फत रक्सौल गम्हरीका उमाशंकर पटेललाइ ६ लाख भारु पेश्कीका रुपमा दिएका थिए ।

उमाशंकरले रेल्वे ट्रयाकमा बम राख्नका लागि अह्राएर आदापुरका दिपक र अरुण रामलाई जनही तीन–तीन लाख भारु दिएका थिए । बम विस्फोटको योजना सफल भएपछि दिपक र अरुणलाइ कुल ३० लाख रुपैयाँ भारु भुक्तानी गर्ने सम्झौता उनिहरु बिच भएको थियो । तर दिपक र अरुणले अक्टोबर १ तारिखका दिन रेल्वे ट्रयाकमा राखेको प्रेसर कुकर बममा प्राविधीक त्रुटी भएका कारण बम विस्फोट नभएपछि उनिहरुको योजना असफल भएको थियो ।

काम नभएपछि दिपक र अरुणलाई बाराको जंगलमा बोलाएर बृज किशोर गिरीले कलैया नगरपालिका वडा नम्बर १० रंगपुरका मोजाहिदिन अन्सारी र शम्भु भन्ने लड्डुको सहयोगमा घाँटी रेटेर हत्या गरेको प्रहरी स्रोतले जनाएको छ । हत्यामा संलग्न गिरी, अन्सारी र लड्डुलाई नेपाल प्रहरीले पक्राउ गरेर अनुसन्धान गरिरहेको छ ।

गिरीलाई नेपाल प्रहरी र विशेष ब्युरोको टोलीले पुष १५ गते पर्साको बिजबनिया गाविस वडा नम्बर ७ गढैया टोलबाट गोली हानेर पक्राउ गरेको थियो । प्रहरीले हानेको गोली लागेर घाइते भएका गिरीको चितवनको भरतपुरमा उपचार भइरहेको छ । यस्तै पुष १४ गते पक्राउ परेका अन्सारी र लड्डुलाई भने बारा प्रहरीले आफ्नो हिरासतमा राखेर अनुसन्धान गरिरहेको छ ।

पक्राउ परेकाहरुको बयानका आधारमा प्रहरीले होदालाई नियन्त्रणमा लिएको हो । रेल्वे ट्रयाकमा बम राख्ने अपराधिक कार्यमा संलग्न भारतका तीन जनालाई पनि भारतीय प्रहरीले पक्राउ गरेर अनुसन्धान गरिरहेको छ । केही दिनअघि बिहारको मोतीहारीमा भारतीय प्रहरीले पत्रकार सम्मेलन गरि नेपाल र भारतमा पक्राउ परेका ६ जनाले आइएसआईका लागि आपराधिक काम गर्ने गरेको दाबी गरेका थिए ।

आइएसआईको निर्देशनमा होदाले परिचालन गरेको समुहले भारत कानपुरको पुखाराया र मालसा रेल्वे स्टेशनको बीचमा गत नोभेम्बर २० तारिखमा भएको इन्दौर पटना एक्सप्रेस रेलमा बम विस्फोट गराएको भारतीय सञ्चार माध्यमले दावी गरेका छन् । उक्त घटनामा एक सय ५१ भन्दा बढिको मृत्यु भएको थियो ।

यो पनि पढन सिफारीस गरिएको छ;

कानपुर रेल दुर्घटनाका मास्टर माईन्ड नेपाली