कुवेतबाट २८ मृतकका परिवारलाई ५ करोड क्षतिपूर्ति

२०७३ फागुन ४ गते बुधबार, प्रकाशित

नेपाली दूतावास कुवेतले वैदेशिक रोजगारीका क्रममा मुत्यु भएका २८ नेपाली नागरिकको क्षतिपूर्ति बापत पाँच करोड पाँच लाख ९९ हजार ७११ रूपैयाँ रकम परराष्ट्र मन्त्रालयमा पठाएको छ । नेपाली दूतावास कुवेतले प्रेस विज्ञप्ति मार्फत आव २०७२/७३ र आव २०७३/७४ को हालसम्मको क्षतिपूर्ति रकम पठाएको जानकारी दिएको छ ।

कुवेतमा विगतका वर्षहरुमा मृत्यु भई क्षतिपूर्ति लिन बाँकी रहेका नेपाली नागरिकको क्षतिपूर्ति प्राप्तिका लागि दूतावासले कानुन व्यावसायीको मद्दत लिएर आवश्यक कार्य अगाडि बढाएको र सोही प्रयत्नको फलस्वरुप क्षतिपूर्ति, बिमा, बाँकी तलब, सेवा पश्चात पाउने रकम सम्बन्धित कम्पनीमार्फत प्राप्त सहयोग जुटाएको जनाएको छ ।

दूतावासले जारी गरेको विज्ञप्ती अनुसार वैदेशिक रोजगारीका शिलशिलामा कुवेतमा ज्यान गुमाएका दीपक श्रीमल, चन्द्रबोल राई, जीतबहादुर कटुवाल, हिकमान तामाङ, जनकबहादुर बस्नेत, कामी सिंह गोले, यामबहादुर बस्नेत, गजेन्द्रकुमार विक, आइतराज तामाङ, सुकान चौधरी, चित्रबहादुर कुवँर, नरबहादुर चेम्जोङ, दुर्गाबहादुर थापा लगायतको क्षतिपुर्ति रकम नेपाल पठाईएको हो ।

त्यस्तै अमृतबहादुर बम्जन, ऋषिप्रसाद देवकोटा, सत्यनारायण साह, दिलबहादुर तामाङ, खड्गकुमार राई, वीरबहादुर गुरुङ, आइबहादुर दर्जी, रामपुकार भण्डारी, विजय विक, गोविन्द विक, सुताइ साह तेली, देवराज ओली, दुलार ठाकुर, केशरबहादुर नेम्वाङ र सुनिता गुरुङले पाउने क्षतिपूर्ति रकम पनि पठाईएको छ । क्षतिपुर्तिवापत वापत ४० हजार ६७० कुवेती दिनारदेखि २५० कुवेती दिनारसम्मको रकम पठाएको दूतावासले जनाएको छ ।