अमेरिकाको टेक्सासमा नेपाल शो २०१७ शुरु

२०७३ चैत २६ गते शनिबार, प्रकाशित

अमेरिकाको टेक्सास राज्यको फोर्ट वर्थमा ३ हप्ते नेपाल शो २०१७ अप्रिल ७ बाट शुरु भएको छ । नेपालमा २ बर्ष अघि गएको भुकम्पले पारेको प्रभाव सम्बन्धि कलाकारहरुले तयार पारेका चित्रकला, हस्तकला र फोटोहरु प्रदर्शनीमा राखिएको छ ।

रोटरी फाउन्डेसनका प्रमुख पावल लुकास, फोर्ट वर्थ कला काउन्सील प्रमुख केरीनविले, स्टोरी साइकल अमेरीकाका निर्देशक राम सि पोखरेल, फोर्ट वर्थ कला केन्द्रका निर्देशक मार्ला वन र स्टोरी साइकलका संस्थापक सौरभ ढकालले संयुक्त रुपमा नेपाल शोको उदघाटन गरेका थिए ।

उक्त प्रदर्शनी स्टोरी साइकल अमेरीकाको फोर्ट वर्थ कला केन्द्र र क्राफ्टेड इन काठमाडौंको आयोजनामा टेक्सास राज्यको फोर्ट वर्थमा ३ हप्ता चल्ने छ । रोटरी फाउन्डेसनका प्रमुख पावल लुकासले पुराना सिप र कलात्मक क्षमताको संरक्षण गर्न अतिआवश्यक रहेको भन्दै नेपालको पूर्ननिर्माणमा कलाकारहरुको महत्वपूर्ण योगदान रहने बताएका छन ।

यसै गरि फोर्ट वर्थ कला काउन्सील प्रमुख केरीनविलेले नेपाली कलाकारहरुको काम देखेर आफु निकै उत्साहित भएको बताएका छन । उनले कलाबाट कथा भन्ने तरिका सबैले सजिलै बुझ्न सक्ने तरिका भएकोले यो प्रदर्शनीबाट नेपालको कथा पनि धेरैले बुझ्ने मौका पाउने बताएका छन ।

कार्यक्रमका संयोजक सौरभ ढकालले स्टोरी साइकलले कलाका माध्यमबाट कसरी कथा भन्न सकिन्छ भन्ने प्रयोग गर्दै आएको बताएका थिए । उनले चित्रकला, हस्तकला, फोटो र भिडीयो लगायतका फरक फरक बिधालाइ एकै ठाउँमा प्रस्तुत गर्न शो आयोजना गरिएको पनि श्पष्ट पारेका छन ।

उनले यस्तो प्रर्दशनीले कलाकारलाई अन्तरराष्ट्रिय रुपमा चिनाउनुका साथै नेपालको केहि हदसम्म सकारात्मक र प्रभावकारी प्रचार हुनेमा आशावादी रहेको बताएका छन ।

स्टोरी साइकलले सगरमाथा क्षेत्रमा संचालन गरेको कथा शिवीर र गत केहि महिना अगाडी सिन्धुलीको दुम्जामा संचालित कला शिवीरमा तयार भएका चित्रकला प्रदर्शनीमा राखिएको छ । मुख्य चित्रकला सुरेम देशार, अनिल महर्जन र आरके थापाका रहेका छन । साथै तासि लामा र जुनी लामाका थान्का पनि प्रदर्शनमा रहेका छन ।

हस्तकलामा क्राफ्टेड इन काठमाडौले काठमाडौका २५ भन्दा बढी कलाकारहरुको संकलन गरेको बिबिध कलामध्ये केहि प्रदर्शन गरिएको छ । साथै जेलमा तयार गरिएका केहि हस्तकला पनि प्रदर्शनीमा राखिएको छ ।

स्टोरी साइकलले बिभिन्न ठाउँमा गरेको कथा शिवीरमा जम्मा गरेका फोटोहरु प्रर्दशनमा रहने छन । तीमध्ये फोटोग्राफर नबिन बरालले खिच्नु भएका लमजुङका हिमालहरुको फोटो बिषेश आकर्षणमा रहेका छन । सगरमाथा र बारपाक क्षेत्रका फोटो पनि छन ।