भरतपुरबारे सर्वोच्चको फैसला दुर्भाग्यपुर्णः एमाले

२०७४ साउन १६ गते सोमबार, प्रकाशित

भरतपुरको वडा नं. १९ मा पुनः मतदान गर्ने निर्वाचन आयोगको निर्णयलाई सदर गर्ने सर्वोच्चको फैसलालाई प्रमुख प्रतिपक्षि एमालेले दुभाग्यपूर्ण भनेको छ । सर्वोच्चको फैसलाले नागरिक सर्वोच्चता र जनमतलाई अपमानित गरेको एमालेको ठहर छ ।

मतगणनाका क्रममा माओवादी कार्यकर्ताले मतपत्र च्यातेपछी भएको बिवादपछी परेको रिटमा सर्वोच्चले आइतबार भरतपुर १९ मा पुनः मतदान गर्ने निर्वाचन आयोगको निर्णयलाई सदर गरेको हो ।

सर्वोच्चको फैसलापछि एमाले सचिव योगेश भट्टराईले भने–‘आजको फैसला दुर्भाग्यपूर्ण छ । यसले राजनीतिको अपराधीकरण तथा अपराधको राजनीतिकरणलाई प्रश्रय दिएको छ । नागरिक सर्वोच्चता र जनमतलाई अपमानित गरेको छ ।’

आफूहरुलाई भरतपुरका जनताप्रति भरोसा रहेको भन्दै उनले त्यहाँका जनताले आफ्नो जनमतमार्फत नागरिकको सर्वोच्चता स्थापित गर्ने विश्वास व्यक्त गरेका छन् ।