कहाँकहाँ सुरु भयो मतगणना ? परिणाम सुन्न व्यग्रता

२०७४ मंसिर २१ गते बिहीबार, प्रकाशित

मंसिर १० गते प्रतिनिधिसभा र प्रदेशसभा सदस्यको पहिलो चरणको निर्वाचन भएका हिमाली तथा उच्च पहाडी ३२ जिल्लाको मतगणना सुरु भएको छ । पहिलो चरणमा प्रतिनिधिसभाका ३७ र प्रदेशसभाका ७४ सिटमा मतदान भएको थियो ।

७ वटै प्रदेशसभाका लागि प्रत्यक्षतर्फ ३३० निर्वाचन क्षेत्र छन् । संविधानसभा जस्तै प्रतिनिधिसभा र प्रदेशसभा दुवैमा मिश्रित निर्वाचन प्रणाली अपनाइएको छ । समानुपातिकतर्फ प्रतिनिधिसभामा ११० र प्रदेशसभामा २२० सिट छन् ।

ओखलढुंगामा संघीय प्रतिनिधिसभाको लिखु गाउँपालिका र प्रदेश सभा कको चिसंखुगढी गाउँपालिकाबाट मतगणना कार्य सुरु भएको छ । भोजपुरमा पनि मतगणना सुरु भएको छ ।

ताप्लेजुङको सदरमुकाम फुङलिङ स्थित जिल्ला अदालत भवनमा मतगणना सुरु गरिएको छ । दार्चुलामा कडा सुरक्षाबीच निजामती कर्मचारी आवास भवनमा मतगणना सुरु भएको छ ।

म्याग्दीमा पनि मतगणना सुरु भएको छ । मत गणनामा कुनै बाधा र अड्चन आएन भने शनिबार बिहानसम्म मतपरिणाम आउने गरी गणना गर्ने तयारी गरिएको निर्वाचन कार्यालय म्याग्दीले जनाएको छ ।

बाजुरामा पाँच बजेदेखि मतगणना सुरु भएको छ । एउटामात्रै निर्वाचन क्षेत्र रहेको बाजुरामा प्रतिनिधिसभा र दुई वटै प्रदेशसभाको मत एकैसाथ गणना सुरु गरिएको छ । बझाङमा जिल्ला पशु सेवा कार्यालयको नयां भवनमा मतगणना भैरहेको छ ।

जाजरकोटमा पनि मतगणना सुरु भएको छ । बैतडीमा प्रतिनिधिसभा र २ वटै प्रदेशसभाको गणना सुरु भएको छ । रामेछापमा पनि मत गणना सुरु भएको छ । डोल्पामा पनि मतगणना सुरु गरिएको छ ।

मुगुमा पनि मतगणना सुरु भएको छ । प्रतिनिधिसभातर्फ एउटा निर्वाचन क्षेत्र र दुईवटा प्रदेशसभा क्षेत्र रहेको मुगुमा ५ बजेदेखी प्रतिनिधिसभाको मतगणना सुरु गरेको बताईएको छ ।

रुकुम पूर्वमा प्रतिनिधि सभा सदस्य तर्फको प्रत्यक्षतर्फको मत गणना थालिएको छ । सिन्धुपाल्चोकको चौतारास्थित कृषि भवनमा तारजाली लगाएर मतगणना सुरु गरिएको छ ।

यता मनाङ र मुस्ताङमा पनि मतगणना सुरु गरिएको छ । निर्वाचन आयोगका अनुसार मतदाता थोरै भएकाले मनाङ र मुस्ताङमा सम्भवत; सबैभन्दा छिटो मतपरिणाम सार्बजनिक हुनेछ ।

पहिलो चरणमा निर्वाचन भएका सबै क्षेत्रमा मतगणना सुरु भईसकेको निर्वाचन आयोगले जनाएको छ । प्राबिधिक कारण कहिँकतै एक दुई घण्टा ढिला भएपनि सबै क्षेत्रमा आजै मतगणना प्रारम्भ गरिने आयोगले जनाएको छ ।

दोस्रो चरणमा आज निर्वाचन भएका क्षेत्रहरुमा पनि जतिसक्यो चाँडै मतपेटिका संकलन गरी मतगणना सुरु गरिने निर्वाचन आयोगले जनाएको छ । मतपेटिका संकलन भईसकेका जिल्लाहरुमा सम्भवत; आजै मतगणना प्रारम्भ हुने बताईएको छ ।