छोरीलाई अपार्टमेन्ट दाईजो दिँदै दिपकराज गिरी

२०७४ फागुन १३ गते आइतबार, प्रकाशित

हाँस्यकलाकार तथा अभिनेता दिपकराज गिरीले आफ्नी एक्ली छोरी मौसमीको कन्यादान गरेसँगै उनले छोरी–ज्वाँईलाई काठमाडौंमा अपार्टमेन्ट गिफ्ट दिने भएका छन् । नुवाकोटको विदुर नगरपालिकाका मेयर सञ्जु पण्डितका छोरा सुशील पण्डितसँग उनकी छोरी मौसमीको शनिबार परम्परागत रिति–रिवाज अनुसार बिबाह भएको हो ।

दिपकराज गिरीकी छोरीको पुरानो वानेश्वरस्थित ‘बाजेको सेकुवा’ मा वैवाहिक समारोह सम्पन्न भएको थियो । विवाहमा दिपकले निकटका साथीभाईहरुलाई मात्र बोलाएका थिए । मौसमी र सुशीलबीच तीन वर्ष पुरानो प्रेम विवाहमा परिणत भएको हो । उनीहरु अध्ययनका लागि भारतमा रहँदा प्रेममा परेका थिए ।

‘जात नमिल्ने’ भन्दै दिपककी श्रीमती र बुवाआमा यो विवाहको विपक्षमा रहेको बताइएको छ । सुशीलको परिवार ब्राहमण हुन् भने मौसमीको परिवार सन्न्यासी हुन् । तर, दिपक ‘अहिलेको जमानामा जातभातको कुरा गर्नु ठिक नहुने’ भन्दै छोरीको पक्षमा उभिएपछि विवाह सम्भव भयो ।

दिपककी छोरी मौसमी अहिले नर्सिङ अध्यापन गरिरहेकी छिन् । उनले बाबुले निर्माण गरेको फिल्म छक्का–पञ्जा २ मा छोटो भूमिकामा अभिनयसमेत गरेकी थिइन् । सुशील भने पढाईकै क्रममा छन् । उनी हाल एमबीए अध्ययनरत रहेको बुझिएको छ ।

बिबाहपछि यो जोडी काठमाडौंमै बस्नेछ । दिपकले आफ्नी छोरीलाई अपार्टमेन्ट दाइजो दिने भएका छन् । उनी अहिले ठिक्कको अपार्टमेन्ट खोजीरहेको बुझिएको छ । विवाहमा उपस्थित रहेकी दिपककी सहकर्मी दिपाश्री निरौलाले भनिन–‘छोरीले चाहेको केटासँग विवाह गराइदिएर दिपक निकै खुशी छन् ।’

छोरी अन्माउने बेला भने दिपक भावुक बनेको उनले दिपाले बताएकी छिन । माइतीघर छोड्दा उनकी छोरी मौसमी पनि निकै रोएकी थिइन् । बाहिर दिपक र दिपाश्रीबीच अफेयरको चर्चा चल्ने गरेको भए पनि दिपककी छोरी मौसमीसँग दिपाश्रीको राम्रो सम्वन्ध छ ।

‘मौसमी मसँग निकै नजिक छिन,’ दिपाश्रीले भनिन, ‘जुनसुकै फङ्सनमा पनि पहिले मलाई खोज्छिन् ।’ बिहेमा मौसमीलाई बेहुली सिंगार्ने काम दिपाश्रीले नै गरेकी थिइन् । दिपकका दुई छोरा र एक छोरी छन् ।

कलाकार दिपकराज गिरीले यसै वर्ष आफ्ना जेठा छोराको बिहे गरेर बुहारी भित्र्याएका थिए । उनका छोरा अष्ट्रेलियामा बस्दै आएका छन् भने श्रीमतीलाई पनि चाँडै उतै लैजाने योजनामा छन् । कान्छा छोरा भने पढ्दै छन् । दिपककी श्रीमती हाउसवाइफ हुन् ।