अर्थमन्त्री लगायत मनोनित ३ सांसदको सपथ फुकुवा

२०७४ फागुन २३ गते बुधबार, प्रकाशित

देउवा सरकारले जाँदाजाँदै राष्ट्रियसभामा मनोनित गरेको निर्णयलाई उल्ट्याएर ओली सरकारले मनोनित गरेका तीन जना सांसदको सपथग्रहण रोक्न सर्वोच्च अदालतले दिएको अन्तरिम आदेश खारेज भएको छ । बुधबार सर्वोच्च अदालतले अन्तरिम आदेश खारेज गरेपछि अब तीन सांसदले सपथ ग्रहण गर्ने बाटो खुला भएको हो ।

यसअघि सर्वोच्च अदालतका न्यायाशीध प्रकाश राउतको एकल इजलासले दिएको अन्तरिम आदेशका कारण अर्थमन्त्रीसमेत रहेका डा. युवराज खतिवडाका साथै रामनारायण बिडारी र विमला पौड्यालले राष्ट्रियसभाको सांसद पदमा सपथ लिन पाएका थिएनन् ।

अब तीनैजना सांसदले सपथ ग्रहण गर्न पाउनुका साथै राष्ट्रपतिको निर्वाचनमा समेत भोट हाल्न पाउने भएका छन् । शेरबहादुर देउवा सरकारका पालामा राष्ट्रियसभाका लागि मन्त्रिपरिषदबाट सिफारिस गरिएका तीनजना सांसदको नाम केपी ओली नेतृत्वको सरकारले फिर्ता लिएको थियो ।

नाम फिर्तापछि ओली सरकारले डा. युवराज खतिवडा, रामनारायण बिडारी र विमला पौड्याललाई राष्ट्रियसभामा सिफारिस गरेको थियो । सिफारिस लगत्तै राष्ट्रपतिले उनीहरुलाई सांसदमा मनोनित गरेकी थिइन् ।

देउवा सरकारको सिफारिसलाई उल्ट्याएर ओली सरकारले आफ्ना मान्छेलाई राष्ट्रियसभाको सांसद बनाएपछि राष्ट्रपतिको कदम असंवैधानिक भएको भन्दै गोपालकुमार बस्नेतसमेतले सर्वोच्च अदालतमा रिट निवेदन दिएका थिए ।

रिटमाथिको प्रारम्भिक सुनुवाई गर्दै न्यायाधीश प्रकाशमानसिंह राउतले तीनैजनालाई सपथ ग्रहण नगर्न नगराउन आदेश दिएका थिए । अदालतको सोही आदेशका कारण फागुन २० गते तीनैजना सांसदको सपथ ग्रहण रोकिएको थियो ।

सोही अन्तरिम आदेशका विषयमा निरन्तरता दिने या नदिने भन्नेबारे बुधबार न्यायाधीशद्वय केदारप्रसाद चालिसे र शारदाप्रसाद घिमिरेको बेञ्चमा छलफल भएको थियो । छलफलपछि अदालतले अन्तरिम आदेशलाई निरन्तरता दिनु नपर्ने निर्णय सुनाएको थियो ।

देउवा सरकारले गरेको सिफारिस राष्ट्रपतिले फिर्ता गरेको नभई मन्त्रिपरिषदले नै फिर्ता लिएको हुँदा यसमा राष्ट्रपतिको कदमलाई असंवैधानिक भन्न नमिल्ने अदालतको निर्णयमा उल्लेख छ । सर्वोच्च अदालतले यो प्रकरणलाई संयुक्त इजलासबाट संवैधानिक इजलासमा सार्ने निर्णयसमेत गरेको छ ।

रिट निवेदनमा उठाइएका संवैधानिक एवं कानूनी प्रश्नहरु संवैधानिक इजलासबाट निरुपण हुनुपर्ने भन्दै अदालतले यसलाई अग्राधिकार दिई संवैधानिक इजलासमा पठाउनू भनेको छ ।