धरौटी तिर्न नसक्दा जेल परिन रोमा न्यौपाने

२०७४ फागुन २७ गते आइतबार, प्रकाशित

ठगी आरोपमा पक्राउ परेकी एउटा खुट्टाको भरमा नाचेर चर्चामा आएकी कलाकार रोमा न्यौपाने धरौटी बुझाउन नसकेपछी जेल चलान भएकी छन् । जिल्ला अदालत, काठमाडौंले तोकेको ३६ लाख ५० हजार रुपैयाँ धरौटी तिर्न नसकेपछि उनी जेल चलान भएकी हुन् ।

अदालतका न्यायाधीश कृष्णराम कोइरालाको इजलासले न्यौपानेलाई उक्त रकम बराबरको धरौटी मागेको थियो । हाल उनलाई केन्द्रीय कारागार चलान गरिएको काठमाडौं प्रहरी परिसरले जनाएको छ । प्रहरीले उनलाई फागुन २४ मा ठगी आरोपमा पक्राउ गरेको थियो ।

रोमासहित उनका पति चिरञ्जीवि विरुद्ध ३६ लाख रुपैयाँ ठगी गरेको उजुरी परेको थियो । उनका पति पक्राउ परे पनि रोमा भने फरार थिइन् । उनीहरूले भोलेन्टीएर एसोसिएसन अफ डिस्याबिलिटिज (भीएडी) नामक संस्था खोलेर ‘भीएडी नेपाल लघुवित्त कार्यक्रम’ को नाममा लाखौं रुपैयाँ ठगी गरेका थिए ।

जिल्ला अदालत काठमाण्डौले रोमा न्यौपानेका पती चिरञ्जीवीलाई दोषी ठहर गर्दै २०७३ पुस २६ मा दुई वर्ष कैद सजाय र साढे ३६ लाख विगो जरिवानाको फैसला सुनाएको थियो । रोमालाई २०७२ सालमा सरकारले युवा प्रतिभा तथा युवा उद्यमी पुरस्कार समेत प्रदान गरेको थियो ।