सहकर्मीको व्यवसाय फस्टाएपछी अपहरण गरी हत्या

२०७४ फागुन ३० गते बुधबार, प्रकाशित

आफ्नो भन्दा व्यवसाय फस्टाएपछी विर्तामोडका सुन व्यवसायी पारस कुमार देवले अर्का सुन व्यवसायी साजन मुखियाको अपहरणपछि हत्या गरेको खुल्न आएको छ । साजनको हत्यामा बिर्तामोड–३, सैनिकमोड बस्ने २९ वर्षीय पारस कुमार देव, बिर्तामोड–८ त्रिवेणी टोल बस्ने १९ वर्षीय दीपेश पौडेल र बिर्तामोड–३ कै २३ वर्षीय प्रकाश भन्ने चिरञ्जीवी ओलीको संलग्नता देखिएको छ ।

प्रहरी अधिकारीहरुका अनुसार पछिल्लो केही समययता मुखियाले सुनचाँदी व्यवसायबाट अकूत सम्पत्ति जोडेका थिए । तर, पारसकुमार देवको ऋद्धिसिद्धी ज्वेलर्सको कारोबार केही समय यता ओरालो लागेको थियो । हत्यारा पारसले आफ्नो व्यापारमा आएको गिरावटको मुख्य कारक साजनलाई ठानेका थिए ।

साजनको हत्या गर्दा निजको कारोबार समेत आफूले गर्न पाउने योजनाका साथ उनको हत्या भएको खुल्न आएको अनुसन्धानमा खटिएका प्रहरी अधिकारीले बताएका छन । देवा ज्वेलर्सका सञ्चालक २६ वर्षीय साजन मुखिया २० गते दिउँसोबाट वेपत्ता भएका थिए । उनको शव सोमबार इलामको रोङ गाउँपालिका–३, कोल्बुङमा भेटिएको थियो ।

पारसले आफ्नो पसलमा काम गर्ने प्रकाश भन्ने चिरन्जिबी ओली र दिपेश पौडेल लगायतलाई पैसा दिएर हत्या गरेको पाइएको प्रहरीले जनाएको छ । प्रहरीका अनुसार २० गते दिउँसो पारसको समूहले सुन किन्ने बहानामा साजनलाई बिर्तामोडस्थित एभरेष्ट बैंक नजिक बोलाएका थिए ।

त्यहाँबाट उनीहरुले साजनलाई अपहरण गरेर तमुटोलस्थित पारसको घरमा लगेर बन्धक बनाएको खुल्न आएको छ । त्यहीँ साजनमाथि कुटपिट गरी प्लास्टिकको डोरीले दुबै हात र घाँटीमा बाँधेर हत्या गरेको खुलेको छ । हत्यापछि उनको शवलाई जुटको बोरामा हालर मेची सडकखण्ड अन्तर्गतम इलामको रोङ नगरपालिका ३ कोल्बुङ, अर्यालचोक नजिक रहेको ठाडो भिरमा लगेर लडाएको अनुसन्धानबाट खुल्न आएको छ ।

अनुसन्धानका क्रममा अपहरणमा पर्नुअघि पारस र चिरञ्जीवीले नयाँ नम्बरबाट पटकपटक सम्वाद गरेको पाईएपछि उनीहरुतिरै अनुसन्धान सोझिएको थियो । प्रहरीले पारस, दिपेश र चिरञ्जिवीमाथि मानव अपहरण तथा शरिर बन्धक, खुनडाँका र संगठित अपराध मुद्दामा जिल्ला अदालतबाट म्याद लिएर थप अनुसन्धान थालेको छ ।