जापान हुँदै विश्वभर उड्ने भए नेपाली जहाज

२०७५ असार ९ गते शनिबार, प्रकाशित

नेपाल वायु सेवा निगमको राष्ट्रिय ध्वजावाहक विमानले जापानको हानेदा विमानस्थल बाहेक अन्य विमानस्थलहरुबाट उडान भर्ने अनुमती पाएसंगै जापानका एयरपोर्टलाई आधार बनाई विश्वभर उडान भर्ने भएको छ । नेपाली ध्वजावाहक विमानले अमेरिका बाहेकका सबै देशमा उडान भर्ने अनुमति पाएको छ ।

नेपाल र जापानको हवाई उडानको सम्झौता पुनरावलोकनपछि यो सम्झौता भएको हो । संस्कृति, पर्यटन तथा नागरिक उड्डयनमन्त्री रवीन्द्र अधिकारीले नेपालले जापानको हानेदा विमानस्थलबाहेक सबै विमानस्थलमा उडान गर्न पाउने गरी गत ४ असारमा नेपाल–जापान सम्झौता पुनरावलोकन भएको बताएका छन ।

उनले संसद्को विशेष समयमा बोल्दै शुक्रबार भने, ‘जापानसँगको सम्झौतापछि पर्यटकलाई सहजसमेत हुने भएको छ ।’ सम्झौताअनुसार नेपाल–जापानबीच सातामा १४ उडान हुनेछन । यसअघि २ मात्र उडान हुने व्यवस्था थियो ।

अब नेपाली एयरलाइन्सले ‘फिफ्थ अफ फ्लाइट’ पनि पाउनेछन् । जसअनुसार नेपालले जापानको एयरपोर्ट प्रयोग गरेर अमेरिका बाहेकका मुलुकमा सिधा उडान भर्न पाउने गरी सहमति भएको उनले जानकारी गराएका छन ।

यसअघि नेपाल र जापानबीच ६ फागुन २०४९ सालमा नेपाल–जापान हवाई उडानसम्बन्धी सम्झौता भएको थियो । तत्कालीन पर्यटन तथा नागरिक उड्डयनमन्त्री रामहरि जोशी र तत्कालीन नेपालका लागि जापानी राजदूत चुइची इतोबीच हवाई उडानसम्बन्धी सम्झौता भएको थियो ।

यसैगरी, अन्तर्रा्ष्ट्रिय नागरिक उड्डयन संगठन (आइकाओ)ले नेपाली आकाश हवाई उडानका लागि सुरक्षित भएको भन्दै कालोसूचीबाट हटाएको छ । सन् २०१३ बाट नेपाली आकाश हवाई उडानका लागि सुरक्षित नभएको भन्दै कालोसूचीमा राखेको आइकाओले जोखिमको सूचीबाट गत साता हटाएको हो ।

नेपालको उडान सुरक्षामा प्रगति भएको भन्दै आइकाओले यस वर्षको प्रेसिडेन्ट अवार्डसमेत नेपाललाई प्रदान गरेको मन्त्री अधिकारीले सदनमा जानकारी गराएका छन । उनले युरोपियन युनियनले सन् २००९ बाट नेपालको हवाई सुरक्षाको विषयमा प्रश्न उठाउँदै कालोसूचीमा राखेको छ ।

नेपालले आइकाओको अवार्ड प्राप्त गरेपछि युरोपियन युनियनमा समेत कालोसूचीबाट हटाउन पत्राचार गरिएको मन्त्री अधिकारीले जानकारी दिएका छन । युरोपियन युनियनले नेपालको पत्रको जवाफ दिँदै आगामी सेप्टेम्बरमा नेपाली आकाश हवाई उडानका लागि सुरक्षित भए नभएको अध्ययन गर्ने जनाएको छ ।

‘विश्वभरका हवाई उड्डयन संस्थाहरूको साझा संगठनले सुरक्षित भएको भन्दै अवार्ड दिइसकेको अवस्थामा युरोपियन युनियनले पनि कालोसूचीमा हटाउनेछ,’ मन्त्री अधिकारीले भने, ‘कालोसूचीबाट हटेसँगै युरोपमा पनि नेपालले सीधा उडान गर्नेछ ।’