प्रियंका र निकको बिहेको फोटो खिच्न मात्रै २५ करोड

२०७५ कार्तिक २६ गते सोमबार, प्रकाशित

अहिलेको दुनियाँमा फोटोले मानिसको जिवनमा कति महत्व राख्छ भन्ने कुरा जो कसैलाई थाहा भएकै कुरा हो । सामान्यतया सम्झनाका लागी खिचिने फोटो सेलिब्रिटीका लागी भने सान र आम्दानीको स्रोत हो ।

आउँदो डिसेम्बर १ मा बिहे गर्न लागेका बलिउड अभिनेत्री प्रियंका चोपडा र हलिउड स्टार निक जोनसको बिबाहको फोटो खिच्न भएको सम्झौताले दुनियाँको ध्यान तानेको छ । यसै पनि उनीहरुको बिहेले अन्तरराष्ट्रिय मिडियाहरुको ध्यान तानेको छ ।

प्रियंका बलिउडमा मात्र नभएर हलिउडमा पनि सक्रिय नायिका हुन् भने निक पनि नाम चलेका गायक हुन् । त्यसैले उनीहरुको बिहेलाई कभर गर्न मिडियाहरुबीच प्रतिस्पर्धा हुने नै भयो । तर, बाहिरिएको पछिल्लो खबर अनुसार एउटा प्रख्यात म्यागजिनले बिहेको फोटो खिच्ने एकाधिकार लिएको छ ।

प्रियंका र निकसँग यसका लागि २५ लाख डलर (करिब २५ करोड रुपैयाँ) को सम्झौता उक्त म्यागजिनले गरिसकेको बताइएको छ । म्यागजिनको नाम भने सार्वजनिक गरिएको छैन । अब प्रियंका र निकको फोटो खिचेर उक्त म्यागजिनले अन्य मिडियालाई बेच्ने छ ।

प्रियंका र निकको बिहे भारतको जोधपुरमा हुनेछ । दुवै जना फरक धर्म मान्ने भएकाले बिहे पनि दुई पटक हुने बताइएको छ । सुरुमा प्रियंकाले मान्ने हिन्दू धर्मअनुसार बिहे हुनेछ भने त्यसपछि निकले मान्ने क्रिस्चियन धर्मअनुसार । दुवै जना एक–अर्काको धर्मलाई सम्मान गर्न राजी भएका छन् ।