जापानवासी शेर्पाहरु ल्होसार धुमधामसँग मनाउँदै
बिगतका बर्षहरुमा झैँ यस बर्ष पनि शेर्पा संघ जापानले बौद्ध धर्मावलम्वीहरुको मुख्य चाड ल्होसारलाई भब्य रुपमा मनाउने तयारी गरेको छ । बौद्ध धर्मावलम्बीहरुले नयाँ बर्षका रुपमा मनाउने ल्होसारलाई भव्य र मनोरञ्जनपुर्ण बनाउन शेर्पा संघ जापान ब्यापक तयारीमा जुटेको छ ।
नयाँ बर्ष २१४६ औँ ग्याल्पो ल्होसार, स मो फाग लो (सुंगुर बर्ष) जापानबासी सबै शेर्पा समुदायले हर्षोल्लासका साथ मनाउने वातावरण निर्माण गर्ने तयारीमा जुटेको शेर्पा संघ जापानका सचिव तथा ल्होसार कार्यक्रम व्यवस्थापन उपसमितिका संयोजक दावा लामा शेर्पाले बताएका छन् ।
ल्होसार बिशेष कार्यक्रम फेब्रुअरी १७ तारिख आईतबारका दिन टोक्योस्थित हामामाचु स्टेसन नजिकैको मन्दिर रेष्टुरेन्टमा हुँदैछ । शुभकामना आदानप्रदान तथा सांस्कृतिक साँझमा टोक्योका स्थानिय कलाकारहरुको प्रस्तुती रहने उप–समिति संयोजक लामाले बताएका छन् ।
ल्होसार बिशेष शुभकामना आदानप्रदान कार्यक्रममा सन् २०१८ मा सेन्मोन गाक्को सोचिगी गरेका शेर्पा विद्यार्थीलाई बधाई तथा सम्मान गर्ने कार्यक्रम पनि रहेको छ । साथै शेर्पा संस्कृती झल्कने नृत्य तथा शेर्पा पोषाक पनि प्रस्तुत गरिने बताइएको छ ।
‘भाषा धर्म र सस्कृतिको संरक्षण, शेर्पा संघ जापानको अभियान’ भन्ने नाराका साथ आयोजना गरिएको ल्होसार बिशेष कार्यक्रममा विविध सांस्कृतिक कार्यक्रम समेत प्रस्तुत गरिनेछ । शेर्पा संघ जापानका अध्यक्ष छेवाङ्ग शेर्पाले जापानबासी नेपालीहरूलाई ल्होसार कार्यक्रममा सहभागी भइदिन आग्रह गरेका छन ।
फेसबुकबाट कमेन्ट गर्नुहोस्