जापानमा निधन भएका मल्लको दाहसंस्कार भोली

२०७५ माघ २० गते आइतबार, प्रकाशित

गत जनवरी पाँच तारिख शनीबारका दिन जापानको कोगामा निधन भएका गोपाल मल्लको भोली ४ तारिख सोमबारका दिन दाहसंस्कार हुने भएको छ । मल्लको इवाराकीकेनस्थित सासिमागुन साकाइमाची नाकाइदोमा अन्तिम संस्कार गर्ने तयारी भएको दर्शन समाजका भुतपुर्व अध्यक्ष सुरज मल्लले जानकारी दिएका छन् ।

कोगा सिटी कार्यालयको सहकार्यमा अपरान्ह २ बजे अन्तिम संस्कार गर्न लागिएको पनि मल्लले बताएका छन् । मृतक मल्लको दाहसंस्कार र श्रदाञ्जलीका लागी जापानमा रहेका उनका आफन्त, दर्शन समाज जापानका पदाधिकारी, उनका साथीभाई र बिभिन्न संघ संस्थाका प्रतिनिधी सहभागी हुने बताईएको छ ।

बर्ष ५१ का मल्लको इवाराकीकेनस्थित कोगा सिटीको हिगासी यामातामा रहेको साथीको कोठामा निधन भएको थियो । बिगत ३१ बर्षदेखी जापानमा बस्दै आएका मल्ल लामो समयदेखी बेरोजगार रुपमा साथीभाईको आश्रयमा बस्दै आएका थिए ।

नियमित जसो मादकपदार्थ सेवन गर्दै आएका मल्लको स्वास्थ्यको उचित हेरचाह नगर्दा निधन भएको उनका निकटवर्तीहरुले बताएका छन् । पुरानो घर म्याग्दी भएका मृतक गोपाल मल्लको परिवार हाल पोखराको पार्दीमा बस्दै आएको छ ।