जापानमा शेर्पाहरुले धुमधामसँग मनाए ग्याल्पो ल्होसार
जापानको तोचिगीबासी शेर्पा तथा गैर शेर्पा नेपाली समुदायले हिमाली शेर्पा तथा बौद्ध धर्मावलम्वीहरुले मनाउने २१४६ औँ ग्याल्पो ल्होसार धुमधामसँग मनाएका छन । शेर्पा संघ क्षेत्रिय समिति तोचिगीको आयोजनामा तोचिगी क्षेत्रमा रहेका शेर्पा तथा गैर शेर्पा नेपाली समुदायले शुभकामना आदानप्रदान तथा सांस्कृतिक कार्यक्रमको आयोजना गरी ग्याल्पो ल्होसार मनाएका हुन ।
तोचिगीसीमा रहेको लाफा स्पोर्टस बार एण्ड ग्रिलमा आयोजना गरिएको ल्होसार बिशेष शुभकामना तथा सांस्कृतिक कार्यक्रममा तोचिगी क्षेत्रमा रहेका बिभिन्न नेपाली संघ संस्थाका प्रतिनिधी तथा नेपाली समुदायको बाक्लो उपस्थिति रहेको थियो ।
आदिवासी जनजाती महासंघ जापानका उपाध्यक्ष पेम्वा शेर्पाको प्रमुख आतिथ्यतामा भएको शुभकामना आदानप्रदान तथा सांस्कृतिक कार्यक्रममा जापानमा रहेका चर्चित नेपाली कलाकारहरुले गित संगित प्रस्तुत गरेर भरपुर मनोरञ्जन प्रदान गरेका थिए ।
लामो समयदेखी गितसंगित क्षेत्रमा सक्रिय पोखरेली गायक सर्वज्ञमान शाक्यको प्रस्तुतीले कार्यक्रमको माहोल तताएको थियो । त्यस्तै गायक नबिन दाहाल, अमृत गुरुङ, लाफा मोन्स्टर ब्याण्डका भिम वाईवा लगायतको टिम, दृष्टि ब्याण्डका कलाकार लगायतको प्रस्तुतीमा पनि सहभागीहरु झुमेका थिए ।
कलाकार बिना गुरुङको नृत्यले कार्यक्रममा रौनक थपेका थियो । कार्यक्रममा शेर्पा संस्कृति झल्कने सांस्कृति नृत्य पनि प्रस्तुत गरिएको थियो । शेर्पा विधि अनुसार पुजापाठ गरी आरम्भ गरिएको कार्यक्रममा बिभिन्न शेर्पा परिकारहरु पनि प्रदान गरिएको थियो ।
प्रमुख अतिथी आदिवासी जनजाती महासंघ जापानका उपाध्यक्ष पेम्वा शेर्पाले आदिवासी जनजातीलाई राज्यले लामो समय देखी बिभेदकारी निती अबलम्वन गर्दै आएको बताउँदै राज्यमा सबै जाति र समुदायको समान पहुँच हुनुपर्ने बताएका थिए ।
निमा शेर्पाको सभापतित्वमा भएको कार्यक्रममा शेर्पा संघ क्षेत्रिय समिति तोचिगीका अध्यक्ष तथा कार्यक्रम संयोजक डेनि शेर्पाले जुन भाषा र धर्मको भए पनि सबैभन्दा पहिला हामी नेपाली भएकाले नेपालभित्र रहेका हरेक जातजातीका चाडपर्व र संस्कार सबै नेपालीका साझा सम्पती भएको बताएका थिए ।
आदिवासी जनजाती महासंघ जापानका सचिव तथा युवा नेता दावा लामा शेर्पाले आफ्नो जाति, भाषा, धर्म र संस्कारको रक्षा गर्दै अन्य जातजातीको संस्कारलाई पनि उत्तिकै सम्मान गर्नु अहिलेको आवश्यकता र समुन्नत नेपाली समाज निर्माणको आधार भएको बताएका थिए ।
कार्यक्रममा एनआरएनए तोचिगीका उप–संयोजक सरोज भेटवाल, किराँत राई यायोक्खा किताकान्तो क्षेत्रका बरिष्ठ उपाध्यक्ष शिवराज राई, सिटी एक्सप्रेस मनि ट्रान्सफर तोचिगी सेवा केन्द्रका कृष्ण प्रसाद गैरे, हाम्रो रेष्टुरेन्ट एण्ड बारका सञ्चालक ओम गुरुङ, लगायत अतिथीको रुपमा थिए ।
फेसबुकबाट कमेन्ट गर्नुहोस्