कम्युनिष्टका नाममा आतंक नमच्चाउः प्रधानमन्त्री

२०७५ फागुन २१ गते मंगलबार, प्रकाशित

प्रधानमन्त्री केपी शर्मा ओलीले नेत्रविक्रम चन्द ‘विप्लव’ नेतृत्वको नेकपालाई कम्युनिष्ट पार्टीको नाममा आतंक मच्चाउने काम तत्काल बन्द गर्न आग्रह गरेका छन् ।

झापाको खुदुनाबारी र इलामको दानावारी नजिकैको जंगलस्थित रहेको सुखानी पार्कमा मंगलबार आयोजित ४६ औँ सुखानी सहिद स्मृति दिवस तथा श्रद्धाञ्जली सभालाई सम्बोधन गर्दै प्रधानमन्त्री ओलीले यस्तो बताएका हुन् ।

प्रधानमन्त्री ओलीले अब जनता मार्ने, लुट मच्चाउने, चन्दा असुल्ने र विस्फोट गराउने कम्युनिष्ट पार्टी नेपालमा नरहेकाले आफूहरु कम्यूनिष्ट भए यस्तो काम बन्द गर्न निर्देशन दिएका हुन् ।

उनले अहिले नेपालमा सबै कम्युनिष्ट पार्टी एक ढिक्का भइसकेको बताउँदै कोही सच्चा कम्युनिष्ट छुटेको भए ढोका खुल्ला रहेको बताएका छन् । सहिदहरुको बलिदान र मूल्याङ्कन गर्न कम्युनिष्ट पार्टी नीति बनाएर अघि बढिसकेको बताउँदै नेकपा अध्यक्षसमेत रहेका प्रधानमन्त्री ओलीले अब नेपालमा दमन र लुटपाटले राजनितिक परिवर्तन नहुने दाबी गरेका छन् ।

वर्तमान सरकार सहिदको सपना पूरा गराउन जनताको हितमै काम गरिरहेको उल्लेख गर्दै उनले सरकारले काम गरेन भन्नुको अर्थ नरहेको जिकिर गरेका छन् । केही शक्ति र प्रतिक्रियावादी समूहले भर्खरै एकता भएको पार्टी फुटाउन लागि परेकोले नेकपामा कुनै असन्तुष्टि नरहेको उनले प्रस्टाएका छन् ।