यती एयरको विमान दुर्घटना, हवाईसेवा अबरुद्ध

२०७६ असार २७ गते शुक्रबार, प्रकाशित

नेपालगञ्जबाट यात्रु बोकेर काठमाडौं आएको यती एयरलाइन्सको विमान अवतरणको क्रममा त्रिभुवन अन्तराष्ट्रिय विमानस्थलको धावनमार्गमा चिप्लिएपछी हवाई सेवा अवरुद्ध भएको छ ।

विमानस्थलका महाप्रबन्धक राजकुमार क्षेत्रीका अनुसार अवतरणका क्रममा विमान कोटेश्वरपट्टीको धावनमार्गमा चिप्लिएर घाँसे मैदान र धावनमार्गको आदि भागमा पुगेको छ ।

विमान चिप्लिएर दुर्घटना भएपछि विमानमा रहेका तीन जना यात्रु घाइते बनेका छन् । उनीहरुलाई तत्कालै एम्बुलेन्सबाट अस्पताल लगिएको छ ।

यति एअरलाइन्सको नाइन एन एएमएम कल साइन विमान कोटेश्वरपट्टिको ट्याक्सी वेको डेल्टा साइड मा चिप्लिएको हो । यो एक वर्षअघि युएस बंगला विमान दुर्घटना भएको स्थान नजिकै हो ।

जहाजमा २ बच्चासहित ६६ जना यात्रु थिए । रनवेको नजिकै विमान दुर्घटना भएपछि तत्कालका लागि २ बजे सम्मका लागि विमानस्थल बन्द गरिएको बिमानस्थल श्रोतले जनाएको छ ।

बिमानस्थल सुचारु हुन अँझै समय लाग्नसक्ने बिमानस्थल सुचना बिभागले जनाएको छ । अहिले घाँसे मैदान र रनवेको आधा भागमा रहेको विमानलाई तानेर रनवेभन्दा बाहिर लैजाने प्रयास भइरहेको छ ।

अन्तराष्ट्रिय उडान दिल्लीमा डाइभर्ट
यता विमानस्थल बन्द भएपछि नेपाली आकाशमै होल्डमा रहेका विमानहरु डाइभर्ट गर्न थालिएको छ । त्रिभुवन विमानस्थल कन्ट्रोल टावरका अनुसार यतिबेला अन्तराष्ट्रिय विमानलाई दिल्लीमा डाइभर्ट गरिएको छ । आन्तरिक उडानलाई भने विभिन्न स्थानमा फिर्ता पठाइएको छ ।

ल्हासाबाट काठमाडौं आएको सिचुवान एयरलाइन्स, कोलकताबाट काठमाडौं आइरहेको बुद्ध एयर र दोहाबाट काठमाडौं आइरहेको कतार एयरलाइन्स आकाशमा होल्ड भएको थियो ।