को–कोले जिते एनआरएनए जापानको निर्वाचन ?

२०७६ भदौ २२ गते आइतबार, प्रकाशित

करिब १ लाख नेपालीको बसोबास रहेको जापानमा गैर आवासीय नेपाली संघ जापानको नयाँ कार्यसमिति चयन भएको छ । सेप्टेम्बर ८ तारिखमा भएको अनलाईन मतदान मार्फत आफ्ना अन्य ३ प्रतिस्पर्धीलाई हराउँदै देवीलाल भण्डारी गैर आवासीय नेपाली संघ जापानको अध्यक्षमा निर्वाचित भएका छन् ।

आगामी (२०१९–२०२१) कार्यसमितिको अध्यक्ष पदमा विजयी भएका देवीलाल भण्डारीले ५८५ मत प्राप्त गरेका छन् भने उनका मुख्य प्रतिद्वन्द्धी मानिएका टासीवांग्दी लामाले ५५५ मत ल्याएका थिए । अन्य दुई जना प्रतिस्पर्धी दिनेसकुमार गुरुङले २३३ मत ल्याएका थिए भने शिवप्रसाद पौडेलले २ सय ४० मत ल्याएका थिए ।

गैर आवासीय नेपाली संघ जापानको बरिष्ठ उपाध्यक्षमा अनिता गुरुङ विजयी भएकी छिन् । गुरुङले प्रतिस्पर्धी सरोजकुमार खत्रीलाई हराउँदै बरिष्ठ उपाध्यक्षमा बाजी मारेकी हुन् । महासचिवमा जनकविक्रम शाहीले निवर्तमान महासचिव बुद्धिराज घिमिरेलाई हराएर विजयी भएका छन् ।

उपाध्यक्षतर्फ लक्ष्मण वानिया र नारायण खड्का निर्विरोध चयन भएका छन् । त्यसैगरी सचिव पदमा विष्णुप्रसाद घिमिरे र टिकाराम खरेल निर्विरोध चयन भएका छन् । क्षेत्रिय उपाध्यक्षतर्फ दिपक केसी निर्वाचित भएका छन् ।

युवा संयोजक पदमा राम थापा (अनिल) विजयी भएका छन् । त्यसैगरी क्षेत्रियतर्फको सचिवमा विकास वस्नेत विजयी भएका छन् । वस्नेत महेश्वर रिसाललाई हराउँदै क्षेत्रिय सचिवमा विजयी भएका हुन् ।

गैर आवासीय नेपाली संघ जापानको महिला उपाध्यक्षमा सविता श्रेष्ठ निर्विरोध चयन भएकी छिन् भने महिला संयोजकमा पनि संगिता अधिकारी निर्विरोध चयन भएकी छिन् । त्यसैगरी कोषाध्यक्षमा निवर्तमान कोषाध्यक्ष कालिका थापा नै निर्विरोध चयन भएकी छिन् । सह–कोषाध्यक्षमा सचिन श्रेष्ठ निर्वाचित भएका छन् ।

गैरआवासीय नेपाली संघ जापानको युवा उपाध्यक्षमा कान्तोका निवर्तमान संयोजक नवीन नीउरे निर्विरोध चयन भएका छन् । अन्तर्राष्ट्रिय समन्वय परिषदको सदस्यमा डण्डपाणी कँडेल र तुल्सीराम खरेल निर्विरोध चयन भएका छन् ।

सदस्यमा राजेश खनाल, सुपेन्द्र घिसिङ, बाबुराम खनाल, महेश कुमार कट्वाल, डिलाराम गैरे, शिवु थापा, जिवन कुमार गुरुङ, अञ्जु भण्डारी चयन भएका छन् । अञ्जु भण्डारी निर्विरोध चयन भएकी हुन भने अरु प्रतिस्पर्धाबाट आएका हुन् ।