एनआरएनए युरोपको उप–संयोजकमा भिड्दै कृष्ण

२०७६ भदौ २४ गते मंगलबार, प्रकाशित

गैर आवासीय नेपाली संघ अन्तर्राष्ट्रिय समन्वय परिषदको निर्वाचन नजिकिँदै गर्दा यतिबेला विश्वका प्राय मुलुकहरुमा राष्ट्रिय समन्वय परिषदका निर्वाचनहरु लगभग सकिएका छन् । सबै देशको राष्ट्रिय समन्वय परिषदको निर्वाचन सकिएपछी विश्वभरका गैरआवासीय नेपालीहरु अन्तर्राष्ट्रिय समन्वय परिषदको चुनावको प्रतिक्षामा छन् ।

गैर आवासीय नेपाली संघ अन्तरराष्ट्रिय समन्वय परिषदको आसन्न निर्वाचनमा एनआरएनए अभियान्ता कृष्ण तिमल्सिनाले युरोपको उप–संयोजकमा उम्मेद्वारी दिने घोषणा गरेका छन् । उम्मेद्वारी घोषणा गर्दै एनआरएनएका अभियान्ता तिमल्सिनाले देश विकासको लागि विदेशमा रहेका नेपालीको ज्ञान सिप र दक्षताको प्रयोग गर्न पर्ने बताएका छन् ।

गैर आवासिय नेपाली संघमा एकता हुन आवश्यक भएको बताउँदै उनले विदेशमा सिकेको ज्ञान देशको विकासमा खर्चिन ढिलाई गर्न नहुनेमा जोड दिएका छन् । उनले युरोपमा एनआरएनए एनसीसीलाई थप बिस्तार गर्न, युरोपमा सकृय राष्ट्रिय समन्वय परिषदलाई अझ संस्थागत, दिगो र एनआरएन आइसीसीप्रति उत्तरदायी बनाउन आफुले उम्मेद्वारी दिएको प्रस्ट्याएका छन् ।

आफ्नो उम्मेद्वारीको औचित्यबारे प्रस्ट्याउँदै उनले युरोपमा बसेका नेपालीहरुको साझा समस्याहरु पहिचान गरी त्यसको निराकरणमा प्रयास गर्न, युरोपमा जन्मे हुर्केका नेपाली बाल बच्चाहरुलाई एनआरएनमा समाहित गर्दै देश, भाषा र संस्कृतिप्रति रुची जगाउन पहल गर्ने जस्ता कार्ययोजना आफूले अगाडी सारेको बताएका छन् ।