कोरोना भाइरसले टोकियो ओलम्पिक सर्ने सम्भावना

२०७६ चैत १० गते सोमबार, प्रकाशित

विश्वरभर फैलिएको कोरोना भाइरस (कोभिड–१९) ले विश्व खेलकुद नै प्रभावित बनिरहेका बेला जापानमा हुने टोकियो ओलम्पिक २०२० सर्ने सम्भावना बढेको छ । अन्तर्रा्ष्ट्रिय ओलम्पिक कमिटी आईओसीले आगामी जुलाई र अगष्टमा हुने ओलम्पिकबारे के गर्ने भनेर आइतबार छलफल गरेको थियो ।

आईसीसीले पनि ओलम्पिक स्थगित हुनसक्ने ग्रिन सिग्नल दिएको छ । तर तत्कालै के गर्ने भन्ने निर्णय गरिसकेको छैन । आईओसी आफैंले टोकियो ओलम्पिकको भविष्य के हुने भन्ने निर्णय गर्न ४ हप्ताको डेडलाइन तय गरेको छ ।

टोकियो ओलम्पिक जुलाई २४ देखि अगष्ट ९ सम्म हुने तालिका छ । तर विश्वभर महामारीका रूपमा फलिएको कोभिड–१९ ले गर्दा सबै खेल गतिविधि प्रभावित भईरहेका छन् । ओलम्पिककै तयारी र क्वालिफायङ इभेन्टहरू समेत कोरोनाले प्रभावित बनेको अवस्थामा ओलम्पिक गर्ने नगर्ने भन्ने टुंगो लागिसकेको छैन ।

अहिले विश्वका विभिन्न देशका ओलम्पिक कमिटी खेलकुद संघहरूले पनि ओलम्पिक स्थगित गर्न माग गरिरहेका छन् । यसै सन्दर्भमा आइतबार आईओसीको कार्यकारी बोर्डको बैठक बसेको हो । जसले विश्वभर भयावह बन्दै गएको कोरोनाका कारण ओलम्पिक सार्ने विषयमा छलफल गरेको थियो ।

ओलम्पिक रद्द गर्नेबारे नसोचेको र स्थगित हुनसक्ने वा अर्को वर्ष गरिन सक्ने आईओसीका अध्यक्ष थोमस बाकले बताएका छन् । चार हप्तापछि ओलम्पिकबारे अन्तिम निर्णय हुने बाकले बताएका छन् ।

यस्तै, अवस्था रहिरहे आईओसीले टोकियो ओलम्पिकबारे निर्णय गर्न अर्को कदम चाल्नुपर्ने जनाएको छ । क्यानडाको ओलम्पिक कमिटीले पनि ओलम्पिक स्थगित गर्नुपर्ने प्रस्ताव राखेको छ । उसले यस्तो माग अघि सार्दै जुलाईमा आफ्नो खेलाडी नपठाउने जनाएको छ ।