नेपालगञ्जमा कोरोना संक्रमितको संख्या २३ पुग्यो

२०७७ वैशाख २३ गते मंगलबार, प्रकाशित

बाँकेको नेपालगन्जमा मंगलबार थप ७ जनामा कोरोनाभाइरसको संक्रमण पुष्टि भएको छ । योसँगै नेपालगन्जमा मात्रै कोरोना संक्रमितको संख्या २३ जना पुगेको छ । नेपालभर संक्रमित हुनेको संख्या ८२ पुगेको छ ।

भेरी अस्पताल नेपालगञ्जमा गरिएको परीक्षणमा ९, ३२, ३४ र ५५ वर्षका महिला तथा २२, ३० र ४० वर्षका पुरुषमा कोरोना पुष्टि भएको स्वास्थ्य मन्त्रालयले जनाएको छ । उनीहरू सबैको स्वास्थ्य सामान्य छ ।

यसअघि आइतबार बाँकेमा एकैदिन १५ जना संक्रमित फेला परेका थिए । संक्रमितको संख्या बढेपछि नेपालगञ्जमा २५ गतेसम्मलाई निषेधित क्षेत्र घोषणा गरिएको छ ।

नेपालगन्जमा कोरोनाभाइरसका संक्रमित पहिलोपल्ट गत शुक्रबार फेला परेका थिए । नेपालगन्ज उपमहानगरपालिका–८ जोलहनपुरुवाका ६० वर्षीय पुरूषमा कोरोना देखिएपछि उनको सम्पर्कमा आएका व्यक्तिलाई पछ्याउँदै परीक्षण थालिएको थियो ।

नेपालगञ्जमा अहिलेसम्म कोरोना संक्रमण पुष्टि भएकाहरू तिनै पुरूषको सम्पर्कमा आएकाहरू रहेका छन् । त्यसो भए के पहिलो संक्रमित व्यक्तिबाटै सबैमा संक्रमण फैलिएको हो त भन्ने कुरामा भने यसै भन्न नसकिने चिकित्सकहरुले बताएका छन् ।

‘पहिलो केस कुन हो भन्ने नै पत्ता लागिसकेको छैन,’ बाँकेका कोरोना फोकल पर्सन नरेश श्रेष्ठले भने ‘पहिलो संक्रमित व्यक्ति ६० वर्षिय पुरुष नै हुन कि, अरूबाट उनलाई सरेको हो? त्यो पत्ता लागिसकेको छैन ।’

मदरसामा पढाउने ती पुरूषको सम्पर्कमा आएकाहरूलाई जाँच्दा नयाँ संक्रमित फेला परेको भए पनि ती पुरूषलाई पनि अरूबाट कोरोना सरेको हुनसक्ने श्रेष्ठको शंका छ ।

‘अरूबाट उनलाई सरेको हो कि, उनी वा अरू बाहिरबाट आएकाले संक्रमण फैलाए अझै प्रष्ट भएको छैन,’ उनले भने । श्रेष्ठले सबैको संक्रमितहरूको ट्राभल हिस्ट्री पत्ता लगाउन नसकिएका कारण संक्रमण कहाँदेखि फैलियो भन्ने थाहा पाउन मुस्किल भएको बताएका छन् ।

पहिलो संक्रमित ६० वर्षीय पुरूष रुपैडिहा, नानपारा लगायतका ठाउँमा (ससुराली सम्म) आवतजावत गरेको देखिए पनि टाढाको ट्राभल हिस्ट्री नदेखिएको श्रेष्ठले जानकारी दिएका छन् ।

‘यताको सम्बन्ध उता र उताको सम्बन्ध यता भएकामा संक्रमित भेटिएको भए पनि उनीहरू धेरै टाढा गएको देखिदैन,’ श्रेष्ठले भने, ‘फेला परेका संक्रमितमध्ये यो बीचमा रुपैडिहा वा नानपारा नगएको कोही पनि छैन ।’

श्रेष्ठले मंगलबार ४ बजेसम्म पहिलो संक्रमित व्यक्तिको सम्पर्कमा आएका व्यक्तिहरूको खोजी गरेर उनी बसेको तथा आवतजावत गरेको बस्तीहरूमा थप स्वाब संकलन गरिने जानकारी दिएका छन् ।

उनले मुस्लिम समुदायका व्यक्तिहरूले आफ्नो समुदायका मानिसहरुको मात्रै नमूना संकलन गरेको भन्ने गुनासो गर्न थालेकाले अन्य समुदायको पनि स्वाब संकलन गर्ने तयारी गरिएको जानकारी दिएका छन् ।

श्रेष्ठका अनुसार कोरोना संक्रमण पुष्टि भएकाहरूमध्ये कसैमा पनि लक्षण देखिएको छैन । कसैमा कुनै लक्षण नदेखिएको पनि गत बिहीबार आशंकाको आधारमा नेपालगन्ज–८ स्थित जामा फूलबारी मस्जिदमा बस्ने ११ जनाको स्वाब संकलन गरेकोमा ६० वर्षिय पुरूषमा कोरोना भेटिएको थियो । ती पुरूष मस्जिदमा नमाज पढ्न र मदरासामा पढाउने गर्थे ।

कोरोना जाँच गर्ने कि नै छैनः उपमेयर थापा
नेपालगन्जमा दुई तीन दिनको अवधिमा २३ जनामा कोरोना संक्रमण फैलिएपछि त्रासदी छाएको छ । सर्वसाधारण मानिसहरुले फोन गरेर जनप्रतिनिधहरुलाई हैरान पार्न थालेका छन् । नेपालगन्जकी उपमेयर उमा थापाले भनिन् ‘मेरो पनि चेकजाँच गर्नुपर्छ, म पनि उनीहरुको सम्पर्कमा आएको हुँ, भन्दै रातदिन फोन गर्छन् ।’

नेपालगन्जमा चाहेजति सबैको एकै साथ जाँच हुन सकिरहेको छैन । किनकी आवश्यक उपकरण र जनशक्तिको अभाव छ । ‘हामीसँग जम्मा ३०–४० वटा जति पिसिआर किट होला, गएराति थप अढाइ सय जति आएको छ,’ थापाले भनिन् ‘ त्यसले त पुग्ने कुरै भएन, कम्तिमा एक हजार बढी पिसिआर किट उपलब्ध हुनुपर्ने थियो ।’

पहिलो पटक फेला परेका व्यक्तिको सम्पर्कमा आएका व्यक्तिलाई पछ्याउँदै जाँदा २३ जनामा संक्रमण भेटिएको भए पनि कसैमा पनि लक्षण नदेखिएको हुँदा सर्वसाधारण झनै त्रासमा रहेको थापाले बताइन ।

अहिलेको आइसोलेसन अस्पताल २५ बेड क्षमताको मात्रै रहेको हुँदा तुरून्त अर्को आइसोलेन अस्पताल बनाउनु पर्ने थापाको भनाइ छ । उपमेयर थापाले अहिलेसम्म सबै संक्रमितको अवस्था सामान्य रहेको भएपनि पछि तलमाथि भए पर्याप्त भेन्टिलेटर नभएकाले त्यसतर्फ पनि तत्काल ध्यान केन्द्रीत गर्नुपर्ने बताइन् ।