सुचना तथा प्रशारण विभाग दर्ता नं.: ८५७/०७५/७६

बाबुको ठेगान नभएका बच्चालाई मावलीको थर

राष्ट्रिय परिचयपत्र तथा पञ्जीकरण विभागले एकल महिलाबाट जन्मेका र पितृत्वको ठेगान नभएका बच्चाको जन्म दर्तासम्बन्धी चार बुँदे परिपत्र जारी गरेको छ ।

पञ्जीकरण शाखाका निर्देशक नवराज जैसीले एकल महिलाबाट जन्मेका र पितृत्वको ठेगान नभएका बच्चाको जन्म दर्ता गर्ने विषयमा थप प्रस्ट पारिदिन विभिन्न स्थानीय तहहरुबाट अनुरोध भई आएको भन्दै दोहोरो दर्ता नहुने गरी ६ हजार ७४३ वडाका सबै स्थानीय पञ्जिकाधिकारीलाई परिपत्र गरेका हुन् । परिपत्र सबै जिल्ला प्रशासन कार्यालय र इलाका प्रशासन कार्यालयलाई बोधार्थ पठाइएको छ ।

Mother Love

परिपत्रअनुसार विवाहअघि जन्म भएको तर पितृत्वको ठेगान नभएको बच्चा भएको एकल महिलाले विवाह गरी बच्चासहित पतिको ठेगानमा सँगै बसेको भए उक्त बच्चाको मावलीकै थर राखी आमाको हालको स्थायी ठेगानामा जन्म दर्ता गरिदिने, विवाहअघि जन्म भएको तर पितृत्वको ठेगान नभएको बच्चा भएको एकल महिलाले विवाह गरी पतिसँगै बसेको तर उक्त बच्चा मावलीमै बसेको भए मावलीकै थर कायम गरी मावलीकै ठेगानामा आमालाई सूचक राखी जन्म दर्ता गरिदिने उल्लेख छ ।

यस्तै बुँदा १ र २ अनुसार बच्चाको जन्मदर्ता भइसकेपछि बाबुको ठेगान पत्ता लागेको अवस्थामा सो जन्मदर्ता नियमानुसार रद्द गरी बाबुको ठेगानाबाट नयाँ जन्मदर्ता गरिदिने साथै बुँदा ४ मा १ र २ वाहेक अन्य अवस्थामा राष्ट्रिय परिचयपत्र तथा पञ्जीकरण ऐन २०७६, राष्ट्रिय परिचयपत्र तथा पञ्जीकरण नियमावली (संशोधन सहित), २०७७ र विभागको यसअघिका परिपत्रअनुसार गर्न पनि अनुरोध गरिएको छ ।

फेसबुकबाट कमेन्ट गर्नुहोस्