जापानले जारी गर्दै उच्च सुरक्षायुक्त नयाँ बैंकनोट

२०८० वैशाख ९ गते शनिबार, प्रकाशित

जापानको केन्द्रीय बैंक बैंक अफ जापानले हालै सार्वजनिक गरेको उच्च सुरक्षायुक्त नयाँ बैंक नोटलाई आर्थिक वर्ष २०२४ देखि जारी गर्न थाल्ने भएको छ । बैंक अफ जापानले २०२३ को अप्रिल महीनाको मध्यतिर सञ्चार माध्यमहरुसामु सो कागजी नोट सार्वजनिक गरेको थियो ।

बीओजेले सो नोटलाई आर्थिक वर्ष २०२४ को पहिलो अर्धवार्षिक अवधिमा प्रचलनमा ल्याउन शुरु गर्ने बताइएको छ । नयाँ नोटहरु टोकियोको चुओ वडामा रहेको मुद्रा संग्राहलयमा प्रदशर्नमा राखिएको थियो । अप्रिल २८ सम्म भने यी नोटलाई बीओजेको सुदुर उत्तरको प्रिफेक्चर होक्काइदोस्थित ओतारु संग्रहालयमा प्रदर्शनमा रखिनेछ ।

जापानले सन् २००४ यता बैंकनोटको डिजाइनमा हेरफेर गरेको यो पहिलो पटक हो । १० हजार येनको सो नोटमा जापानमा पूँजीवादका पिता भनेर चिनिने उद्योगपति शिबुसावा एईचीको तस्वीर छ । ५ हजार येनको नोटमा भने अग्रणीय महिला शिक्षाकर्मी सुदा उमेकोको तस्वीर छ ।

१ हजार येनको नोटमा जापानको आधुनिक मेडिशिनको जग बसाल्न सघाउने कितासातो शिबासाबुरोको तस्वीर छ । नयाँ नोटमा थीडी होलोग्राम, एचडी वाटरमार्क, लुमिसेन्ट मसी, माइक्रोप्रिन्टिङसमेत नक्कल गर्न नमिल्ने नवीनतम् प्रविधिहरुको प्रयोग गरिएको छ । जारी गरिएको नयाँ नोटमा हेराईको कोणअनुसार थ्रीडी होलोग्राम फरक फरक देखिन्छ ।