जापानमा पार्टटाईम काम गर्नेलाई बेरोजगारी भत्ता

२०८० वैशाख १३ गते बुधबार, प्रकाशित

जापानले हप्ताभरमा २० घण्टाभन्दा कम समय काम गर्ने पार्ट–टाइमर कामदारहरूलाई बेरोजगारी बीमाका केही सुविधा वा लाभहरु दिनेबारे सोच्न थालेको छ ।

श्रम बजारमा चरम कामदार अभावबीच पार्ट टाइमरहरुको घरपरिवारलाई टेवा दिन र रोजगारीका लागि पुनः तालिमको अवसरहरु बढाइदिने लक्ष्य राखेर यसबारे विचार विमर्श गर्न लागिएको बुझिएको भन्दै निक्केईले समाचार छापेको छ ।

अहिलेको नियमअनुसार हप्तामा कम्तिमा २० घन्टा काम गर्ने अनि कम्तिमा ३१ दिनसम्म जागिरको ठेगान भएका कामदारहरु मात्रै जापानको बेरोजगारी बीमा कार्यक्रममा शहभागिताका लागि योग्य छन् । यस्ता कामदारहरुले बेरोजगारी भत्ता, छोराछोरी स्याहार्न बिदा पाउने गरेका छन् ।

यिनीहरुले तालिम तथा सीप विकासका लाभहरू पनि पाइरहेका छन् । तर हप्तामा २० घन्टा भन्दा कम समय काम गर्नेहरुलाई यी सबै सुविधाहरु छैन । अब भने नीति निर्माताहरुले हप्तामा २० घण्टाभन्दा कम काम गर्नेहरुमा पनि बेरोजगारी बीमाका केही सुविधाहरु दिने बारे छलफल शुरु गरेको बुझिएको छ ।

यस्ता कामदारहरुलाई फूल टाइम काम गर्ने कामदारहरू बन्ने अवसरका लागि पुनः तालिम हासिल लगायत अवसर सिर्जना गर्ने पक्षमा पनि उनीहरु रहेका बताइएको छ ।