शनिवारदेखि कोभिडसम्बद्ध प्रतिबन्ध हटाउँदै जापान

अनिल कुमार शाही २०८० वैशाख १४ गते बिहीबार, प्रकाशित

आगामी शनिबारबाट जापानले कोरोना भाइरसको महामारी फैलिन नदिन सीमापारबाट आउने यात्रीहरुमाथि लगाएको सबैखाले प्रवेश प्रतिबन्ध हटाउने तयारी गरेको छ । जापानको सरकारी सञ्चार माध्यम एनएचकेमा प्रकासित समाचार अनुसार कानूनी रुपमा कोभिडको वर्गिकरण घटाउनु अघि नै यस्तो गर्न लागिएको हो ।

यसअघि भने जापान सरकारले मे ८ देखि सिमापारबाट आउने यात्रीहरुमाथी लगाइएका प्रतिबन्धहरु हटाउने घोषणा गरेको थियो । सोही दिन देखि जापानमा कोभिडलाई मौसमी रुघाखोकीकै श्रेणीमा पुनः वर्गिकरण गरेर भाइरसको सबैभन्दा न्यून ५औं श्रेणीमा झार्न लागिएको थियो । तर समाचारमा उल्लेख गरिए अनुसार जापान सरकारले अहिले भने सीमा नियन्त्रण अन्त्य गर्ने मितिलाई अगाडि सार्ने तयारी गरिरहेको छ ।

हाल जापान छिर्ने मानिसलाई आफूले कोभिड विरुद्धको खोपको तीन ओटै मात्रा लगाएको प्रमाण देखाउनु पर्ने नियम लागु गरिएको छ । सरकारले मुख्य भूमि चीनबाट प्रत्यक्ष उडानबाट जापान आउने सीमित संख्याका यात्रीहरुलाई र्यान्डम तरिकाले परीक्षण गर्न लगाउने व्यवस्था पनि खारेज गर्ने अपेक्षा गरिएको छ ।

जापानमा यही हप्ता देखि गोल्डन विकको सार्वजनिक बिदा शुरु हुँदैछ । यो छुट्टी मे ७ सम्म चल्छ । यो अवधिमा विदेश यात्रामा जाने जापानीहरुको संख्या बढ्ने अनुमान छ । यसलाई विष्लेशकहरुले सरकारले विदेश घुमेर स्वदेश फर्किने जापानीहरुका लागि प्रक्रिया सरल बनाउन खोजेको रुपमा अथ्र्याएका छन् ।

प्रतिबन्धहरु हटाएपछि पनि ज्वरो वा रुघाखोकी देखिएका यात्रीहरुको भने स्वेच्छिक रुपमा स्वास्थ्य चेक जाँच भने गरिने अधिकारीहरुले बताएका छन् ।