‘प्रेमगीत’को टाईटल गीत गायन प्रतियोगितामा ५५९ सहभागी

२०७२ माघ १५ गते शुक्रबार, प्रकाशित

दुई महिना अगाडि चलचित्र ‘प्रेमगीत’को शिर्षगीतको कभर गीत गाउनका लागि भन्दै यसको निर्माण कम्पनी आशुसेन फिल्मस्ले प्रतियोगीताको घोषणा गरेको थियो । यो प्रयितोगीताका लागि विश्वभरबाट ५५९ जनाले कभर गीत गाएर पठाएको यसको निर्माणपक्षले पत्रकार सम्मेलनको आयोजना गरेर जानकारी दिएको छ ।

सम्पूर्ण भिडियोलाई आजबाट आशुसेन फिल्मस्को युटुब च्यानलमा अपलोड गरिएको जानकारी निर्माता सन्तोष सेनले दिएका छन् । यी भिडियो मध्येबाट सर्वाधिक धेरै भिजिटर पाउन सफल १० भिडियो छानिनेछ ।

यस्तै, भिजिटर कम भएर पनि प्रतिभावान् कलाकारमध्येबाट ५ जनालाई वाइल्र्ड कार्ड इन्ट्रीको रुपमा प्रवेश गराइनेछ । उत्कृष्ट १५ को फाइनल वृहत्त सांगीतिक कन्सर्ट मार्फत फागुन ८ गते गरिने जानकारी पत्रकार सम्मेलनमा गराइयो । गायिका अञ्जु पन्त, गायक सुगम पोख्रेल र संगीतकार अर्जुन पोख्रेलले उत्कृष्ट एक छान्नेछन् ।

विजेताले कलर्स मोबाइलको तर्फबाट नगद एक लाख पुरस्कारका साथै आगामी चलचित्रमा गाउने मौका समेत पाउनेछन् । यस्तै, सम्पूर्ण १५ जनालाई एक-एक थान कलर्स मोबाइल प्रदान गरिनेछ । आज भन्दा अगाडि कभर गीत गाउनेले आफ्नै युटुबबाट अपलोड गरिएका भिडियो र त्यसको भिजिटरलाई मान्यता नदिइने पत्रकार सम्मेलनमा बताइको छ ।

निर्माता सेनले फेसबुक मार्फत आफ्नो चलचित्र सफल भएको आभास भएको बताउदै टाइटल गीतको भिडियो सेयर र ट्याग गर्न आग्रह समेत गरेका छन । माघ २९ गतेबाट प्रदर्शनमा आउने यो चलचित्रलाई सुदर्शन थापाले निर्देशन गरेका छन । गीतसंगीतका कारण सर्वाधिक चर्चामा रहेको यो चलचित्रमा पूजा शर्मा र प्रदिप खड्काको मुख्य भूमिका छ । चलचित्रमा रेनशा राइको कोरियोग्राफी, राजेश श्रेष्ठको छायांकन रहेको छ ।