पोखरामा भेटियो एसएलआरको गोली

२०७३ जेठ २९ गते शनिबार, प्रकाशित

पोखराको फिर्के खोलामा अत्याधुनिक हतियारको गोली फेला परेको छ । पोखरा–८ फिर्के खोलामा रहेको फिर्के तमु समाजले शनिवार सरसफाइ गर्ने क्रममा अत्याधुनिक हतियारमा प्रयोग हुने एसएलआरको २४ राउण्ड गोली फेला परेको हो ।

एसएलआरमा प्रयोग हुने ७ दशमलव ६२ एम एमको २४ राउण्ड गोली र ९ एमएमको ब्राउनिङ पेस्तोलमा प्रयोग हुने दुई राउण्ड गोली स्थानीयले सरसफाइको क्रममा फेला पारेपछि प्रहरीलाई बुझाएका हुन ।

कालो कपडाको थैलीमा पोको पारेको अवस्थामा फेला परेको थियो । एसएलआरको २४ राउण्ड गोलीसहित पेस्तोलको दुई राउण्ड गोली फेला परेपछि सरसफाइमा संलग्न स्थानीयले नजिकै रहेको सशस्त्र प्रहरी वल कालिका गणलाई खबर गरेको थियो ।

कालिका गणले उक्त गोलीको बारेमा वडा प्रहरी कार्यालय बैदामलाई खबर गरेपछि गोलीलाई बैदाम प्रहरीले नियन्त्रणमा लिइ अनुसन्धान थालेको वडा प्रहरी कार्यालय बैदामका प्रमुख मोहनमणी अधिकारीले जनाएको छ ।

गोली भेटिएको स्थान सशस्त्र प्रहरीको कालिका गणबाट दुईसय मिटर तल रहेको छ ।