१० जिल्लाबाट ३६ नक्कली डाक्टर पक्राउ (सुचिसहीत)
नेपाल प्रहरीको केन्द्रीय अनुसन्धान ब्यूरो (सिआइबी) ले नक्कली प्रमाणपत्रका आधारमा डाक्टर भएका ३६ जनालाई पक्राउ गरेको छ । गत शुक्रबार र शनीवार पक्राउ परेका उनीहरुको सिआईबीले आज नाम सार्वजनिक गरेको हो । करिब चार महिनाको अनुसन्धानपछि सिआइबीले शुक्रबार देशका १० जिल्लाका अस्पतालहरुमा एकसाथ अपरेशन चलाएको थियो ।
यसअघि नक्कली पाईलट र ईन्जीनीयरलाई तह लगाएको सिआइबीले यसपटक नक्कली डाक्टर तह लगाउन ‘अपरेसन क्वाक’ नाम दिएर कारवाही सञ्चालन गरेको थियो । पक्राउ परेका डाक्टरहरुलाई जिल्ला अदालत काठमाडौंमा ठगी मुद्दामा म्याद थप गरि आवश्यक कारवाही सुरु भएको सिआइबी जारी गरेको विज्ञप्तिमा उल्लेख छ ।
सिआईबीका अनुसार नक्कली प्रमाण पत्र पेश गरेका कारण पक्राउ पर्नेमा सबैभन्दा धेरै काठमाडौंमा १३ जना डाक्टर रहेका छन् । पक्राउ परेका डाक्टर मध्ये ८ जना पुरुष र ५ जना महिला रहेका छन् ।
त्यसपछी दोस्रो स्थानमा पर्साबाट ९ जना पक्राउ परेका छन् । पर्सामा पक्राउ परेका सबै पुरुष डाक्टर रहेका छन् । यस्तै चितवनबाट ३, ललिपुरबाट २, विराटनगरबाट ३, जनकपुरबाट २, सुनसरीबाट १, झापाबाट १, दाङ्गबाट १ र कास्कीबाट १ जना पक्राउ परेका छन् ।
नक्कली शैक्षिक प्रमाणपत्रधारी डाक्टरविरुद्ध नेपाल प्रहरीको केन्द्रीय अनुसन्धान ब्युरो (सिआइबी)को यो कारबाही अहिलेसम्मकै सबैभन्दा ठूलो हो । क्वाक अपरेशनमा काठमाडौंको ट्रमा सेन्टर र नर्भिकसहित कान्तिपुर डेन्टल कलेज, किस्ट मेडिकल कलेज, लोकहित क्लिनिकमा नक्कली डाक्टर भेटिएको सिआइबीले जानकारी दिएको छ ।
पक्राउ परेका अधिकांश डाक्टरहरुको आइएस्सीको प्रमाणपत्र नै नक्कली भेटिएको छ । उनीहरुले पेश गरेको प्रमाण पत्रको रेकर्ड सम्बन्धित कलेजमा नभएको सिआईविले जनाएको छ । कतिले वास्तविकभन्दा बढी नम्बर राखेको त कतिले एसएलसीको समेत नक्कली प्रमाणपत्र पेश गरेको भेटिएको छ । पक्राउ परेका सबै डाक्टरले एमवीवीएस कोर्स भने पढेको पाईएको छ ।
नक्कली शैक्षिक प्रमाणपत्रधारी डाक्टर विरुद्धको अपरेशनमा नेपाल मेडिकल काउन्सिलले नक्कली शैक्षिक प्रमाणपत्रधारी डाक्टर र उनीहरु कार्यरत अस्पतालको सुची सिआइबीलाई उपलब्ध गराएको थियो । छानविनमा परेकाहरुले पेश गरेको प्रमाणपत्र नक्कली हो कि होइन भन्ने जाँच गर्न उच्च माध्यमिक शिक्षा परिषदले साथ दिएको हो ।
पक्राउ परेका नक्कली डाक्टरको सुची तल हेर्नुहोस;
फेसबुकबाट कमेन्ट गर्नुहोस्