‘वारि जमुना’का गायक गुरुङ्गको निधन

२०७३ भदौ ९ गते बिहीबार, प्रकाशित

लोकप्रिय गायक खेमराज गुरुङको आज असामयीक निधन भएको छ । ‘वारि जमुना पारि जमुना’, ‘आलुतामाले’ लगायत लोकप्रिय गीतका गायक गुरुङको ४२ वर्षको अल्पायुमै निधन भएको हो । गुरूङको चावहिलस्थित मेडिकेयर अस्पतालमा उपचारका क्रममा साँझ ५ः५० बजेतिर निधन भएको अस्पतालले बताएको छ ।

जण्डिस देखिएर १० दिनअघि अस्पताल भर्ना गरिएका गुरुङको स्वास्थ्य बिग्रिँदै गएपछि आईसीयूमा राखिएको थियो । अवस्था झन नाजुक भएपछि उनलाई बिहिबार विहान ८ बजेतिर भेन्टिलेटरमा राखिएको थियो ।

थप उपचारका लागी बिहिबार उनलाई एयर एम्बुलेन्सबाट दिल्लीको मेदान्त अस्पताल लैजाने तयारी गरिएको थियो । चिकित्सकले अवस्था नाजुक भएकाले लैजान उपयुक्त नभएको सल्लाह दिएपछी अन्तिम समयमा रद्द गरिएको थियो ।

चिकित्सकहरुका अनुसार अस्पताल भर्ना गर्दा उनको कलेजो कामै नलाग्ने भएको थियो भने मिर्गौलामा पनि समस्या देखिएको थियो । गायक गुरुङका जीवन, जीवन–२, अनमोल, धरान–पोखरा, सोल्टी, आलुतामा, ढाक्रे र घुमफिर एल्बम निस्किएका छन् ।