सेप्टेम्बर ७ मा आउने भो आईफोन सेभेन

२०७३ भदौ १४ गते मंगलबार, प्रकाशित

विविध अनुमान र अड्कलबाजीका बिच अन्ततः एप्पलले आफ्नो नयाँ संस्करण आइफोन सेभेन सार्वजनिक गर्ने भएको छ । निकै प्रतिक्षित र अनेक अनुमानका बिच एप्पलले आईफोन सेभेन सार्वजनिक गर्ने मिति तय गरेको हो ।

पत्रकारहरुलाई पठाईएको निम्तो पत्रमा एप्पलले आफ्नो नयाँ संस्करणको आइफोन आगामी सेप्टेम्बर ७ मा सार्वजनिक गर्ने उल्लेख गरेको छ । आइफोन सेभेनसँगै एप्पलले नयाँ एप्पल वाच पनि सार्वजनिक गर्नसक्ने अनुमान गरिएको छ ।

बिभिन्न सञ्चारमाध्यममा आएका जानकारी अनुसार आईफोन सेभेनमा ३.५ एमएको अडियो ज्याक नहुने बताइएको छ । जसका कारण यो फोन यसअघिका फोन भन्दा निकै पातलो हुने अनुमान गरिएको छ । यसो हुने हो भने, आइफोन सेभेनका प्रयोगकर्ताले वायरलेस हेडफोन लिनुपर्नेछ ।

एप्पलले तीन प्रकारका आइफोन सेभेनलाई बजारमा ल्याउने तयारी गरेको विभिन्न स्रोतले दाबी गरेका छन् । यसको एन्टिना लाइनको ठाउँमा पनि थोरै परिवर्तन गरिनेछ । यो आइफोन अरुभन्दा धेरै वाटर रेसिस्टेन्ट हुने पनि बताइएको छ ।

यसको र्याम ३ जीबीसम्म रहने छ । यसपटक एप्पले आफ्नो बेस मोडल १६ जीबीलाई परिवर्तन गरेर ३२ जीबी गर्ने देखिएको छ । अर्थात यसमा कम्तीमा पनि ३२ जीबीको स्टोरेज हुनेछ । यसलाई १२८ जीबी र २५६ जीबीसम्म बढाउन सकिने पनि बताईएको छ ।

आइफोन सेभेनमा ड्युअल लेन्स क्यामरा हुने कुरा निकै पहिलेदेखि गरिएको थियो । भर्खरै लिक भएका केही जानकारीमा पनि आइफोन सेभेनको एक मोडेलमा सिंगल लेन्स हुने छ भने अर्कोमा ड्युअल लेन्स हुने बताइएको छ । सम्भवत; आइफोन सेभेन प्लसमा ड्युअल लेन्स हुनेछ ।