भारतलाई पशुपति पुनर्निर्माण दिने प्रस्ताव फिर्ता

२०७३ भदौ २३ गते बिहीबार, प्रकाशित

भूकम्पका कारण क्षतिग्रस्त बनेका पशुपति परिसरका मठमन्दिर बनाउने जिम्मा भारतलाई दिने प्रस्ताव संस्कृति पर्यटन तथा नागरिक उड्डयन मन्त्री जीवनबहादुर शाहीले फिर्ता गरिदिनुभएको छ ।

बुधबार नेपाल पर्वतारोहण संघको २६ औं वार्षिक साधारणसभामा बोल्दै मन्त्री शाहीले पशुपति क्षेत्रभित्रका मन्दिरसमेत बनाउने गरी भारतीय प्रस्ताव आएको बताउँदै आफूले त्यो प्रस्ताव फिर्ता गरेको बताउनु भएको हो । उहाँले पशुपति नेपालको धरोहर भएको भन्दै मन्दिरको भित्री क्षेत्रको निर्माण नेपाल सरकार आफैंले गर्ने बताउनु भयो ।

पशुपति मन्दिर परिसरका २५ भन्दा बढी मठमन्दिर, सत्तल सहितका सम्पदा जीर्णोद्धारका लागि भारत सरकारलाई अनुमति दिन सरोकारवाला निकायबीच केही दिन अघि सहमति भएको थियो ।

पुरातत्व विभाग र पशुपति क्षेत्र विकास कोषबीच गत साता सहमति गरेर भारत सरकारलाई सबै मन्दिर बनाउन दिने सहमति स्वीकृतिका लागी मन्त्रिपरिषदमा लगिएको थियो ।