दुईओटा अमेरीकी लडाकु विमान उत्तर कोरीयातर्फ

२०७३ भदौ २८ गते मंगलबार, प्रकाशित

चेतावनीलाई बेवास्ता गर्दै उत्तर कोरियाले एकपछी अर्को परमाणु बम परीक्षणलाई निरन्तरता दिएपछि अमेरिकाले त्यसको कडा जवाफ दिने तयारी गरेको छ । अमेरिकी वायु सेनाका दुई बम बर्षक विमान उत्तर कोरियातर्फ उडेका छन् ।

उत्तर कोरियाविरुद्ध अमेरिकी बम बर्षक विमान उडेको यो पहिलो पटक हो । उत्तर कोरिया मामलाका अमेरिकी विशेष प्रतिनिधि सुग किमले अमेरिकाले उत्तर कोरिया विरुद्ध कडा प्रतिवाद गर्ने तयारी गरिरहेको खुलासा गरेका छन् ।

उत्तर कोरियाले परमाणु परीक्षणको शृङ्खला अन्तर्गत पाँचौ परमाणु परीक्षण गर्ने तयारी गरिराखेका बेला अमेरिकाले चालेको कदमलाई अन्तराष्ट्रिय जगतमा महत्वका साथ हेरिएको छ । गत शुक्रबार मात्र उत्तर कोरियाले ५.३ म्याग्निच्यूडको कृत्रिम भूकम्प महसुस हुने गरी परमाणु बम परिक्षण गरेको थियो ।

उत्तर कोरियाले यस अघि सन् २००६, २००९, २०१३ र यसै वर्षको जनवरीमा गरी चारवटा शक्तिशाली परमाणु बम परीक्षण गरिसकेको छ । अमेरिका उत्तर कोरियाको परमाणु बम परीक्षण विरुद्ध अन्तराष्ट्रिय जगत एकजुट हुनुपर्ने पक्षमा छ ।

अमेरिकी विशेष प्रतिनिधि किमका अनुसार अमेरिका उत्तर कोरियासँग सार्थक छलफलका लागी सदैव तयार छ । उत्तर कोरियाको परमाणु परीक्षण विरुद्ध दक्षिण कोरियाले समेत पटक–पटक चेतावनी दिइराखेको छ ।