मृत भेटिए मलेसियामा वेपत्ता भएका डिल्ली

२०७३ असोज १० गते सोमबार, प्रकाशित

मलेसियामा सम्पर्क बिहिन भएको २८ दिनपछि एक युवा मृत अवस्थामा फेला परेका छन् । बैदेशिक रोजगारीका शिलशिलामा मलेसिया पुगेका सुर्खेतको काफलकोट–३ घर भएका डिल्लीराज बुढा करिब एक महिना पछि मृत भेटिएका हुन ।

मृत भेटिएका बुढा मलेसियाको निलाईमा रहेको एक इलेट्रोनिक्स कम्पनीमा कार्यरत थिए । डिल्लीराज वुढाको शव निलाईको वन्दरवारु विपिएमको जंगलमा फेला परेको हो । मृतक बुढाको शव चिन्न नसक्ने अवस्थामा भेटिएको हो ।

सोहि कम्पनीमा कार्यरत मृतकका भतिज मानवहादुर वुढाले शवको पहिचान गर्नुभएको हो । भतिज मानबहादुरले भन्नुभयो–‘विभिन्न प्रमाणहरुको आधारमा मात्र ठम्याउन सकें, लास त चिन्न सक्ने अवस्थामा थिएन ।’

भतिज मानबहादुरका अनुसार मृतक डिल्लीराज बुढाले प्रयोग गरेको मोवाइल, पैसा, साँचोहरु सवै स्थानीय प्रहरी कार्यालयमा सुरक्षित रहेको छ । मृतकको शव अहिले अस्पतालमा राखिएको छ । शवलाई नेपाल पठाउनको लागि पहल भईरहेको छ ।