दसैँमा नेपाली सेनाका निशुल्क बस ‘रुटसहित’

२०७३ असोज २२ गते शनिबार, प्रकाशित

बडादसैँको उपलक्ष्यमा नेपाली सेनाले घर विदामा जाने सैनिक तथा उनीहरूको आश्रित परिवारका लागि आजदेखि निशुल्क बस सेवा सुरु गरेको छ । सेनाले आजदेखि असोज २३ गतेसम्म काठमाडौंबाट विभिन्न प्रमुख शहरहरुमा बस सेवा सञ्चालन गर्न लागेको सैनिक जनसम्पर्क निर्देशनालयद्वारा जारी विज्ञप्तिमा उल्लेख गरिएको छ ।

काठमाण्डौबाट ईटहरी, हेटौँडा, दोलखा, रामेछाप, चौतारा, त्रिशुली, धादिङ्ग, बुटवल, पोखरा, धनगढी, र नारायणगढसम्म जाने र आउने गरी निःशुल्क बस सेवा सुरु गरिएको विज्ञप्तिमा जनाइएको छ । बसहरू सम्बन्धित स्थानबाट प्रत्येक दिनको बिहान छ बजे छुट्ने छन् । प्रति सैनिक बढीमा परिवारका ४ जनाले सुविधा लिन पाउने छन् ।

महानवमीदेखि एकादशीसम्म ३ दिन (आश्विन २४–२६) काठमाडौं उपत्यकाभित्र सार्वजनिक सवारी साधन न्यून मात्र चल्ने भएकोले सो दिनहरूमा सबैका लागी निशुल्क बससेवा सञ्चालन गर्ने विज्ञप्तीमा जनाईएको छ । सैनिक तथा गैह्र सैनिक व्यक्तिहरूको आवागमनमा सुविधा पु¥याउने उद्देश्यले निःशुल्क बस सेवा सञ्चालन हुने सेनाले जनाएको छ ।

तीन दिन ८ वटा छुट्टा–छुट्टै रुटहरूमा प्रत्येक दिन बिहान छ बजे, ११ बजे र चार बजे भद्रकालीबाट ३० सिट क्षमताको १–१ वटा बस निःशुल्क संचालन गर्ने व्यवस्था मिलाएको निर्देशनालयले जनाएको छ ।