‘६क्का पन्जा’ लिकको आरोपितले गरे आत्महत्या

२०७३ पुष २९ गते शुक्रबार, प्रकाशित

चलचित्र ‘६क्का पन्जा’ लिक गरेको आरोप लागेका युवकले आत्महत्या गरेका छन । फेसबुक मार्फत ‘६क्का पन्जा’ लिक गरेको आरोप लागेका नवलपरासी कावासोती घर भएका कृष्ण सुवेदीले आत्महत्या गरेका हुन् ।

काठमाडौंको चावहिल बस्ने २५ वर्षीय सुवेदीले गएराति आफ्नै कोठामा झुण्डिएर आत्महत्या गरेका हुन् । गौशाला प्रहरीका अनुसार मृतक सुवेदी आफ्नै कोठामा झुण्डिएको अवस्थामा फेला परेका थिए ।

प्रहरीका अनुसार उनले कोठाको फ्यानको सिलिङमा गलबन्दीको पासो लगाएर आत्महत्या गरेका छन । नवलपरासीबाट परिवार काठमाडौं आएपछि शुक्रबार विहान मुचुल्का गरिएको छ र शव आफन्तले बुझेका छन् ।

सुवेदीले सुसाइड नोट पनि लेखेका छन् । जसमा आफ्नो आत्महत्यामा कसैलाई दोष नदिनू भनिएको छ भने बैंकमा रहेको एक लाख रुपैयाँ बहिनीलाई दिनू भनिएको छ । तर, उनको सुसाइड नोटमा छक्का पन्जा पाइरेसीको आरोपबारे भने केही लेखिएको छैन ।

चलचित्र पाइरेसीबारे अनुसन्धानका क्रममा महानगरीय प्रहरी अपराध महाशाखाले उनीसहित चार जनासँग सामान्य सोधपुछ गरेको थियो । तर, पाइरेसी गर्ने व्यक्ति अर्कै भएको र उनीहरुको संलग्नता नदेखिएकाले सचेत मात्र गराएर छाडीएको थियो ।

चलचित्र निर्माता दीपकराज गिरीले पक्राउ परेकालाई थुनामा नराख्न प्रहरीसँग आग्रह गरेपछि उनीहरु छुटेका थिए । तनावमा आएर उनले आत्महत्या गरेको हुनसक्ने प्रहरीले अनुमान गरेको छ । हाल युरोप भ्रमणमा रहका गिरीले सुवेदीको आत्महत्याप्रति दुख व्यक्त गरेका छन् ।