हरिबहादुरले जोगाए एमालेको लालकिल्ला हेटौँडा
कांग्रेस–माओवादी गठबन्धनलाई पराजित गर्दै हेटौंडा उपमहानगरपालिकामा नेकपा एमालेले बिजय हाँसिल गरेको छ । हेटौंडाको मेयरमा एमालेका हरिबहादुर महत र उपमेयरमा एमालेकै मीना लामा बिजयी भएकी छन् ।
मेयरमा एमालेका हरिबहादुर महत २३ हजार १२४ मत प्राप्त गरेर बिजयी भएका छन् भने निकटतम प्रतिद्धन्द्धी नेपाली कांग्रेसका आनन्द पराजुलीले २२ हजार ५०९ मत प्राप्त गरेका छन् ।
त्यस्तै उपमेयरमा एमालेकी मीना लामाले २३ हजार ४३७ मत प्राप्त गरेर बिजयी भएकी छन् भने निकटतम प्रतिद्धन्द्धी माओवादी केन्द्रका बलराम वलले १७ हजार ११ मत मात्र प्राप्त गरेका छन ।
मेयरमा ६१५ मतको फरक पर्दा उपमेयरमा भने एमालेकी मीनाले करीव ६ हजारको फरमा जित हाँसिल गरेकी छन् । उपमहानगरपालिकाका बहुमत वडामा पनि एमालेले बिजय हाँसिल गरेको छ ।
मतगणनाको सुरुदेखिनै कांग्रेस–माओवादी गठबन्धनका उम्मेद्वार पराजुलीले महतलाई पछि पार्दै आएका थिए । तर हेटौंडा बजार प्रवेश गरेपछि महतले कांग्रेस उम्मेदवार पराजुलीलाई टक्कर दिएका थिए ।
हेटौंडा उपमहानगरपालिकाको बिजयलाई एमाले र कांग्रेस माओवादी गठबन्धन दुवैले प्रतिष्ठाको विषय बनाएका थिए । तर राप्रपा अध्यक्ष कमल थापाले मतदान गरेको यो उपमहानगरपालिकामा राप्रपा भने तेस्रोमा निकै तल खुम्चियो ।
राप्रपालाई हेटौंडामा एमालेपछिको दोस्रो शक्तिका रुपमा लिइन्थ्यो । मेयरमा निर्वाचित भएका महत हेटौंडाका पूर्व उपमेयर हुन् । उपमेयर मीना लामा एमाले जिल्ला उपसचिव तथा लोकतान्त्रिक आदिवासी जनजाति महासंघकी केन्द्रीय सदस्य हुन् ।
सम्बन्धित सामग्री
फेसबुकबाट कमेन्ट गर्नुहोस्