तिन दिनदेखि रोकिएको धरानको मतगणना सुरु
धरान उपमहानगर–९ को मतगणना चलिरहँदा गणकले गलत मनसाय राखी एउटा पार्टीले प्राप्त गरेको मत अर्कै पार्टीका लागि योगफल तयार पारिदिएपछि उत्पन्न समस्याका समाधानका लागी राति अबेरसम्म चलेको बैठकले निकास निकालेको छ ।
बैठकमा अबरुद्ध मतगणना सुचारु गर्ने बिषयमा सहमति भएपछी ५९ घन्टादेखि अवरुद्ध रहेको मतगणना आज बिहानबाट चालु भएको छ । अहिले यसअघि गणना भईसकेका वडा नम्बर १ देखी ८ सम्मको मतलाई पुनः रुजु गर्ने कार्य भईरहेको छ ।
प्रमुख निर्वाचन अधिकृत अर्जुनकुमार कोइरालाको प्रमुख सक्रियतामा राति अबेरसम्म धरानमा चलेको बैठकले यसअघिका निर्वाचन अधिकृत जयप्रसाद महतको सट्टामा अर्का मतदान अधिकृत कमल थापालाई नियुक्त गरी वडा नम्बर १ देखि ८ सम्म गनि सकिएको मतको पुनः रुजु गर्ने र गणना भइरहेको वडा नं ९, १० र ११ को मत पुनः गणना गर्ने सहमति भएपछि मतगणना सञ्चालन हुने पक्का भएको हो ।
अब कसैले पनि गल्ती दोहोरिन नदिनका लागि सतर्कता अपनाउने पनि सहमति भएको बताइएको छ ।
मतगणकका रुपमा रहेका दुई कर्मचारीले गरेको नियोजित गल्तीप्रति गम्भीर आपत्ति जनाउँदै आएको नेकपा (माओवादी केन्द्र) लगायतका राजनीतिक दलको आग्रहमा ती कर्मचारीहरु हाललाई निलम्बित भएको बताइएको छ भने अरू बाँकी ती कर्मचारीले कस्तो सजाय पाउने हुन् भन्ने यकिन भइसकेको छैन ।
गणना भइसकेको वडाको नतिजाअनुसार वडा नं १ र २ मा नेपाली काँग्रेसले सबै पद जितेको छ भने ३, ४, ५, ६, ७ र ८ वडामा नेकपा (एमाले)ले जितेको छ ।
धरान उपमहागनरको कुल ८० हजार मतदातामध्ये ५३ हजार ८१२ जना मतदाताले मात्र मतदानमा सहभागिता जनाएर मत हालेका छन् ।
धरानमा विसं २०६८ को जनगणना अनुसारका कुल मतदातामध्ये २६ हजार १८८ मतदाता मतदानमा सहभागी भएका छैनन् । ती सहभागी नभएका मतदातामध्ये अधिकांश वैदेशिक रोजगार वा शिक्षा आर्जनका लागि विदेशमा रहेको हुनसक्ने अनुमान गरिएको छ ।
फेसबुकबाट कमेन्ट गर्नुहोस्