जापानमा हगिबिस ताइफुका कारण १९ को मृत्यु

अनिल शाही २०७६ असोज २६ गते आइतबार, प्रकाशित

जापानी सञ्चार माध्यमहरुले उल्लेख गरे अनुसार निकै शक्तिशाली भनिएको हगिविस ताईफुका कारण हालसम्म १९ जनाको मृत्यु भएको छ । डुबानमा परेका र जोखिम क्षेत्रमा उद्दार कार्य भईरहेकाले मृत्यु हुनेहरुको तथ्यांक अँझै बढ्ने सरकारी अधिकारीहरुले बताएका छन् ।

हगिविस ताइफुमा परी १६ जना बेपत्ता भएको खबर छ । जापानभरी १ सय भन्दा बढी घाईते भएको सरकारी अधिकारीहरुले बताएका छन् । ताइफुसँगै आएको घनघोर बर्षाका कारण नदिहरुमा पानीको बहाव उच्च हुन गई धेरै क्षेत्रहरुमा डुवान परेको छ । बाढीपहिरो र डुबानमा परेका क्षेत्रमा उद्धार कार्य भईरहेको छ ।

खासगरी चिकुमा नदी किनारको बाँध भत्किँदा मध्य जापानको शहर नागानो सबै भन्दा धेरै प्रभावित भएको जापान सरकारले जनाएको छ । नदी किनार भत्किएर आवासिय क्षेत्रमा पसेको पानीले पाँच मिटरसम्म डुवान गरेको बताइएको छ । जापानको भु, पुर्वाधार, यातायात तथा पर्यटन मन्त्रालयका अनुसार नौओटा प्रिफेक्चरमा कम्तिमा ३३ ओटा पहिरो र भुस्खलन भएको छ ।

निकै शक्तिशाली भनिएको हगिविस सुपर ताइफुका कारण अति प्रभावित मानिएका टोकियो, गुन्मा, साइतामा, कानागावा, यामानाशी, नागानो, निगाता, सिजुओका, तोचिगी, फुकुसिमा, इबाराकी, इवाटे र मियागी प्रिफेक्चरमा सबैभन्दा उच्च ५ तहसम्मको चेतावनी जारी गरिएको थियो ।

ताइफुले सबैभन्दा बढी चिवा र इचिहारा प्रिफेक्चरमा क्षति पुर्याएको छ । चिवा र इचिहारामा १२ ओटा घरहरु क्षतविक्षत भएका छन् भने ७० भन्दा बढी घरमा आंशिक भन्दा धेरै क्षति पुगेको जनाइएको छ । सरकारले बिहानै देखी प्रभावित क्षेत्रमा उद्धार कार्यलाई तिव्रता दिएको छ । क्षतीको पुर्ण विवरण आउन समय लाग्ने सरकारले जनाएको छ ।

हगिविस ताइफुका कारण राजधानी टोकियो लगायत ताइफुबाट प्रभावित क्षेत्रमा बन्द गरिएका ट्रेन चल्न सुरु भएका छन् । शनिबार र आईतबार बिहान सम्म बन्द गरिएका हवाई सेवाहरु पनि सुचारु गरिएको छ । विद्युत र पानी अवरुद्ध भएका क्षेत्रहरुमा जतिसक्यो चाँडो जनजिवन सामान्य बनाउन सरकार दुढताका साथ लागिपरेको छ ।