फुजी हिमाल चढ्दा मृत्यु भएका शेर्पाको जापानमै अन्त्येष्टी

२०७९ चैत २६ गते आइतबार, प्रकाशित

जापानको सबैभन्दा अग्लो हिमाल फुजी हिमाल चढ्ने क्रममा लडेर मृत्यु भएका एक नेपाली युवाको जापानमै दाह संस्कार गरिने भएको छ । एक अमेरिकी र दुई जापानी सहितको टोलीमा हिमाल आरोहण गर्न गएका सेर्की छिरिङ शेर्पाको आरोहण गरेर फर्किने क्रममा चिप्लिएर मृत्यु भएको थियो ।

उनी ट्रेकिङ गाइडका रुपमा हिमाल आरोहणमा गएका थिए । सोलुखुम्बु नाम्चे घर भएका शेर्पा जापानमा ट्रेकिङ गाइडकै रुपमा काम गर्थे । उनीहरुको टोली मार्च ३० मा आरोहणमा गएको थियो । मार्च ३१ मा फर्किने क्रममा मध्याहन्न १२ बजेतिर दूघर्टना भएको थियो । शेर्पाको मृत्यु ठ्याक्कै कति बेला भयो भनेर एकिन नभएको बताइएको छ ।

शेर्पाको शब भने अप्रिल ५ मा मात्रै हिमालबाट उद्धार गरेर ल्याइएको थियो । प्रतिकूल मौसमका कारण हेलिकप्टरबाट उद्धार हुन नसकेपछि १५ जनाको टोली पठाएर उद्धार गरिएको थियो । मृतक शेर्पा शेर्पा संघ जापानको सल्लाहकार समेत थिए ।

शेर्पा झन्डै २ दशकदेखि जापान बस्दै आएका थिए । उनको साथमा श्रीमती अनि ११ वर्ष र ५ वर्षका छोराहरुसँगै बस्ने गरेको बताइएको छ । शेर्पाको अप्रिल १० मा जापानमा नै अन्तिम दाहसंस्कार गरिने भएको छ ।