बम बिस्फोटबाट भाग्यले बाँचेका प्रधानमन्त्री किशिदा

२०८० वैशाख ६ गते बुधबार, प्रकाशित

वाकायामा प्रिफेक्चरमा अप्रिल १५ मा चुनावी प्रचार प्रसार कार्यक्रममा सहभागी हुने क्रममा जापानका प्रधानमन्त्री फुमिओ किशिदालाई लक्षित गरेर प्रहार गरिएको पाइप बम निकै शक्तिशाली भएको अनुसन्धानले देखाएको छ । प्रधानमन्त्री किशिदालाई लक्षित गरेर गरिएको सो बम प्रहारमा प्रधानमन्त्री र अन्य कसैलाई पनि चोट लागेन ।

तर सो विष्फोटक पदार्थ प्रधानमन्त्री किशिदा नजिकै विष्फोट भएको भए उनी गम्भीर घाइते हुन सक्ने वा मानिसहरुको मृत्यु नै हुन सक्ने गरी शक्तिशाली भएको विश्लेषण गरिएको छ । प्रधानमन्त्री किशिदा रहेको स्थानभन्दा करीब ६० मिटरको दूरीमा अर्को बम पनि विष्फोट भएको थियो । सो बमले पड्किएको स्थानमा पुर्याएको क्षति हेर्दा किशिदा केही समय र दुरीले मात्रै बाँच्न सकेको आकलन गरिएको छ ।

पाइप बमको ढक्कनको भाग करिब २ मिटर अग्लो कन्टेनरको भित्तामा गाडिएको थियो । बम विस्फोट भएर छरपस्ट भएर बमको ढक्कन त्यहाँ गएर गाडिएको अनुमान गरिएको छ । अनुसन्धानका क्रममा विस्फोट भएको पाइपको मुख्य एक टुक्रा घटनास्थलबाट करिब ४० मिटर टाढा गोदाम नजिकै भेटिएको थियो । त्यति टाढासम्म पुग्ने टुक्राले कुनै जिवित वस्तुमा लागेको भए उसको ठहरै मृत्यु हुन सक्थ्यो भन्दै स्थानीय सञ्चार माध्यमहरुले समाचार प्रकाशन/प्रसारण गरेका छन् ।